» Notisias

Kuarta, 08 Agustus 2012

Simu Fila Fali Sra. Idelta Maria Rodrigues nu’udar Sekretária Estadu ba Promosaun Igualdade iha V Governu Konstitusionál

Iha loron 8 fulan Agostu 2012 funsionáriu Sekretaria Estadu ba Promosaun Igualdade (SEPI) ho haksolok simu Sra. Idelta Maria Rodrigues nia loron ba dahuluk nu’udar Sekretaria Estadu ba Promosaun Igualdade ba V Governu Konstitusional. Sra. Idelta Maria Rodrigues hamutuk ho Membru Governu tomak hetan tomada posse husi Presidente Repúblika Sr. Taur Matan Ruak iha Palácio Nobre iha loron 8 fulan Agostu tinan 2012, Ho ida ne’e Sra. Idelta Maria Rodrigues ba dala rua ona sai nuudar Sekretária Estadu ba Promosaun Igualdade.

Funsionáriu hamutuk ho Diretór Jerál, Diretór Diresaun tomak, no Asesor hato’o benvindu ba Sra. Idelta Maria Rodrigues ho esperansa sei servisu diak liután iha V Governu Konstitusionál no hadia buat sira ne’ebé mak presiza duni atu hadia. Sra Idelta Maria Rodrigues hato’o obrigadu ba funsionáriu tomak no husu ba sira atu servisu hamutuk diak liután nuudar ekipa. “Ita hotu hatene katak esforsu barak mak ita halo ona iha tinan lima mandatu IV Governu Konstitusionál hodi promove igualdade jéneru no hakbiit feto. Maibé sei barak liután mak ita presiza halo,” katak Sra. Idelta.

Iha loron ne’e mós Diretór Jerál Sr. Thomas da Silva liu husi liafuan badak hato’o ba Sra. Idelta Maria Rodrigues katak tinan lima liu ona agora la’o ho tinan lima foun mai iha V Governu Konstitusionál , hamutuk haree servisu ho diak, atu nune’e ita bele lori SEPI tinan lima mai ho diak liután. Diretór Jerál mós informa katak Diretór Jerál halo ona reuniaun ho Inspetora Jerál, Diretór Nasionál Polítika Dezenvolvimentu Jéneru, Diretora Administrasaun & Finansas, Xefe Departementu hotu, no Asesor hotu hodi trasa Planu Asaun Anuál ba tinan 2013.

Alein de ida ne’e Sra. Idelta Rodrigues iha nia lia menon ba funsionáriu sira katak sira la bele rona ba liafuan ne’ebé hafahe ka hamonu instituisaun. “Funsionáriu hotu la bele rona lia anin ne’ebé semo ba semo mai, tan ida ne’e sei halo servisu la la’o ba oin. Husu mós ba funsionáriu sira atu metin liután iha servisu ekipa, rona malu, atu bele hamutuk lori SEPI ba oin,” tenik Sra Idelta. Sekretária Estadu mós dehan tan, “Buat ne’ebé mak la diak iha IV Governu Konstitusionál mai ita hotu hamutuk atu bele hadia, hamutuk halo mudansa ba sistema ne’ebé sei falta, no buat ne’ebé diak ita kontinua dezenvolve iha V Governu Konstitusionál.”

Serimonia kiik-oan ne’ebé oferese husi funsionáriu SEPI la’o ho kmanek no nakonu ho espíritu ne’ebé forte, esper a katak atu alkansa servisu no programa SEPI ba oin.


Departamentu Media SEII | Author : Chyqa dZouza
Loron Boot SEPI
Loron Internasionál Feto RuráL
Loron Nasionál Feto Timor-Leste
Kampaña Loron 16 Ativismu Kontra Violénsia Hasoru Feto
Loron Internasionál Feto
Arkivu
Statistika Vizitantes

00665834

Ohin loron : 9
Hits ohin loron : 67
Total : 123250
Hits : 665834
Online : 3