» Notisias

Segunda, 14 November 2016

Formasaun kona-ba Metodu Peskiza Sensivel Jéneru

Nu’udar implementasaun husi programa atu atinje objetivu estratéjiku “Hakbiit Kapasidade Institusionál”, Sekretaria Estadu ba Apoiu no Promosaun Sosiu-Ekonómika FETO (SEM) haruka funsionáriu na’in hitu ba tuir formasaun kona-ba “Metodu Peskiza Sensivel Jéneru no Violénsia Bazeia ba Jéneru”.

Formasaun ne’e hala’o iha Universidade Gadjah Mada (UGM), Yogyakarta, Indonesia hahú husi loron 7 Novembru to’o loron 11 Novembru 2016. Fasilitadór no Formadór hotu-hotu mai husi UGM ida-idak ho sira-nia área kompeténsia.

Funsionáriu sira-ne’ebé partisipa iha formasaun ne’e maka: João Lino Guterres (Departamentu Monitorizasaun & Avaliasaun), Angelina Ave Maria Pires (Departamentu Apoiu Sosiu-Ekonómiku), Napolião de Andrade Soares (Departamentu Peskiza), Brigida da Costa (Bibliotika), Noemia Magno (Pontu Fokál Dili), Fátima Lourdes Alves (Pontu Fokál Liquiça), no Pedro Ximenes (Pontu Fokál Ainaro).

Tópiku sira ne’ebé partisipante aprende mak hanesan: Teoria, Konseitu no Asuntu Jéneru; Gender Mainstreaming ka Abordajen Integrada Jéneru; Oinsá halo Analiza Jéneru; no Metodu Peskiza Sensivel Jéneru. Partisipante sira mós aprende asuntu jéneru iha nivel polítika, ne’ebé haree liu ba tópiku: Asuntu Jéneru no Analize Jéneru iha Polítika no Lejislasaun; Lei no Direitu Feto; no Violénsia Doméstika.

Parisipante sira mós hala’o vizita kampo hodi haluan sira-nia koñesimentu relasiona ho asuntu jéneru. Vizita ne’e halo ba Sentru Artezanatu Kasongan. Hotu tiha halo vizita, sira mós halo aprezentasaun kona-ba sira-nia observasaun no fasilitadór sira fasilita diskusaun hodi aprofunda sira-nia koñesimentu.