» Notisias

Tersa, 12 Maret 2019

Ekipa SEII Partisipa iha Enkontru nivel Altu kona-ba Feto iha Poder/Women in Power ne’ebé Lidera hosi Prezidente Asembleia Jerál

Iha loron 12 fulan Marsu tinan 2019, S.E. Sekretária Estadu ba Igualdade no Inkluzaun Sra. Maria José da Fonseca Monteiro de Jesus no ekipa partisipa iha eventu nivel altu kona-ba Feto iha Poder/Women in Power ne’ebé lidera hosi prezidente Asembleia Jerál. Eventu ne’e halibur hamutuk membru governu, reprezentante governu, observador hosi Asembleia Jerál, setór privadu no sosiedade sivíl atu identifika bareira ne’ebé impede partisipasaun no lideransa feto sira nian no fahe mós prátika di’ak sira ne’ebé bele aselera empoderamentu feto sira iha setór ida ne’e.

Iha eventu nivel altu ne´e, S.E. Sekretária Estadu ba Igualdade no Inkluzaun mós halo intervensaun badak liuliu iha diskusaun meza redonda kona-ba Futuru Lideransa Feto nian/Future of Women’s Leadership, hodi hato’o prátika di´ak ne’ebé governu Timor-Leste halo ona atu hakbiit feto iha setór oioin iha nivel nasionál, munisipál no suku. Sra. Maria de Jesus hatoo katak governu Timor-Leste uza sistema quota hanesan estratéjia ida atu hasa´e partisipasaun feto iha nivel polítika no agora partispasaun feto iha parlamentu iha ona porsentu 40.

Iha nivel suku, maske partisipasaun feto iha de’it porsentu 5 hanesan xefe suku maibé ida ne’e hanesan aumento hosi porsentu 3 iha tinan anterior. Iha intervensaun ne’e, Sra. Maria de Jesus mós hatete katak Programa PNDS iha impaktu boot ba hakbiit feto iha área rurál liuhosi feto sira nia envolvimentu iha jestaun projetu nian. Governu Timor-Leste rekoñese katak asuntu jéneru presiza hetan atensaun makaas liuliu iha funsaun públika ne´ebé partisipasaun feto iha de’it porsentu 35.

Iha tempu ne’ebé hanesan Sra. Maria de Jesus fahe mós prátika di’ak ne’ebé Governu no Komisaun Funsaun Públika halo ona liuhosi kriasaun no aprovasaun Dekretu-Lei ba Rejime Konkursu, Selesaun no Rekrutamentu ba pessoal Administrasaun Públika, Promosaun Rejime Jerál Kareira Servidor Públiku no Dekretu-Lei kona-ba distinsaun no prémiu iha administrasaun públika ne’ebé fó preferénsia ba feto wainhira iha kualifikasaun ne’ebé hanesan entre feto no mane.


Departamentu Media SEII | Author : Media_SEII
Loron Boot SEPI
Loron Internasionál Feto RuráL
Loron Nasionál Feto Timor-Leste
Kampaña Loron 16 Ativismu Kontra Violénsia Hasoru Feto
Loron Internasionál Feto
Arkivu
Statistika Vizitantes

00667453

Ohin loron : 174
Hits ohin loron : 1686
Total : 123415
Hits : 667453
Online : 3