» Notisias

Kuarta, 16 Juli 2019

Enkontru kona-ba Estatístika Jéneru

Edifísiu SEII-Dili, 16/7/2019- Sekretaria Estadu ba Igualdade no Inkluzaun liuhosi Diretór-Jerál SEII, Sr. Armando da Costa, hala’o enkontru ho Asesór Estatístika hosi Australian Bureau of Statistics (ABS), Sr. Chris Hinchcliffe, hodi koalia kona-ba oinsá SEII bele hahú dezenvolve baze de dadus ba jéneru ne’ebé sentralizadu.

Estatístika hosi ABS agora daudaun serbisu hamutuk ho Diresaun-Jerál Estatístika Timor-Leste liuhosi Programa Governansia ba Dezenvolvimentu (GfD). Hanesan parte ida hosi sira nia knaar, sira hakarak atu kontribui ba serbisu SEII nian atu hadi’ak jestaun dadus ba estatístika jéneru.

Iha fulan hirak ba oin SEII sei serbisu hamutuk ho ABS no GDS atu dezenvolve prosesu ne’ebé simples atu halo jestaun ba dadus administrativu jéneru no Estatístika Sosiál hosi Australia mak sei fornese treinamentu ba funsiunáriu SEII kona-ba Dezenvolve Sistema Sentralizadu ida ba Jestaun Dadus.

Serbisu ida ne’e sei fasil no efisiente liu ba SEII atu halo relatóriu internasionalmente ba ONU liuhosi CEDAW no Relatóriu Deklarasaun Beijing, no ida ne’e mós bele hadi’ak disponibilidade dadus atu informa programa no dezeña polítika SEII nian.