» Notisias

Kinta, 01 Maret 2012

Vizita S.E. Sra. Idelta Maria Rodrigues no Delegasaun bá Estadus Unidus Amérika

Sekretária Estadu Promosaun Igualdade, S.E. Sra. Idelta Maria Rodrigues lidera delegasaun Timor-Leste kompostu hosi Ofisial Seniór hosi SEPI, Ministériu Solidariedade Sosial no NGO lokal partisipa iha Segunda Konferénsia Mundial kona-ba Hela-Fatin Feto Sira Nian iha Washington, D.C., Estadus Unidus Amérika komesa hosi 27 to’o 1 Marsu 2012.

Konferénsia loron ha’at ne’e hetan resultadu di’ak tebes iha ne’ebé Timor-Leste bele estabelese ligasaun, hetan ferramentu no rekursu esensiál bá servisu iha área prevensaun Violénsia Doméstika no Violénsia Bazéia bá Jéneru.

Enkontru ho Prinseza Dinamarka Sua Alteza Real Mary

Wainhira partisipa iha konferénsia ne’e, S.E. Sra. Idelta Maria Rodrigues halao vizita kortezia no halao diskusaun relasiona ho asuntu feto nian ho Prinseza Dinamarka Sua Alteza Real Mary. Sekretária Estadu relata bá Sua Alteza Real kona-ba progresu feto sira nian iha Timor-Leste no louva servisu ne’ebé mak Sua Alteza Real halao ona liu hosi ninian fundasaun, Mary Foundation.

Sua Alteza Real hato’o disponibilidade atu bele fó asisténsia hodi bele ajuda liu tan problema hirak ne’ebé mak feto Timor-Leste enfrenta. Ikus mai antes ramata, Sekretária Estadu hato’o hela Tais Timor-Leste bá Sual Alteza Real ho gravura feto Timor-Leste tutur sanan rai, nudar lembransa hosi ita nian rai doben.

Enkontru ho S.E. Sra. Melanne Verveer, Embaixadóra Itinerante (Duta Besar Keliling) bá Asuntu Global Feto

Pozisaun Embaixadóra Melanne Verveer nian mak pozisaun ida bá dalauluk S.E. Prezidente Barrack Obama kria tanba hare’e bá importánsia asuntu feto bá Prezidente rasik no mós bá ninian administrasaun tomak.

Sekretária Estadu, S.E. Sra. Rodrigues no Embaixadóra Verveer halao diskusaun kordiál no informa bá malun kona-ba progresu asuntu feto nian iha Estadus Unidus Amérika no Timor-Leste. S.E. Sra. Rodrigues hato’o liu tan katak Timor-Leste iha tiha ona Lei kona-ba Violénsia Doméstika no halao mós diskusaun regular iha Televizaun Nasionál kona-ba violénsia doméstika no violénsia bazéia bá jéneru, ne’ebe hetan louva bo’ot hosi Embaixadóra Verveer.

Embaixadóra Verveer tuir mai hato’o hela mós disponibilidade kooperasaun iha futuru hodi bele halao kapasitasaun bá iha administradór hela fatin bá feto hirak ne’ebé mak sofre violénsia doméstika no violénsia bazéia bá jéneru iha Estadus Unidus Amérika nudar oportunidade ida ne’ebé di’ak tebes.

Enkontru ho S.E. Sr. Scott Busby, Vise Sekretáriu Estadu Interinu bá Demokrásia, Direitu Umanu no Traballu, MNE, Estadus Unidus Amérika.

Enkontru ida mós halao iha Ministériu Negósiu Estranjeiru Estadus Unidus Amérika ho Señor Busby iha ne’ebé Sekretária Estadu Sra. Rodrigues hato’o bá nia no ninian delegasaun relasiona ho progresu feto sira nian ne’ebé mak durante ne’e alkansa tiha ona iha Timor-Leste. Sr. Busby hato’o disponibilidade hosi MNE Estadus Unidus Amérika atu fó apoiu asesoría hosi Ministériu Justisa atu bele ajuda Timor-Leste relasiona ho mekanizmu kona-ba implementasaun lei violénsia doméstika no violénsia bazéia bá jéneru iha Estadu Unidu Amérika. Sr. Busby mós akresenta hodi hato’o hela gratidaun bá Prezidente no governu Timor-Leste bá sira nian disponibilidade atu hato’o kandidatu ida no ikus mai manan hodi sai membru Executive Board UN Women.

Tur Aliansa Distritu bá Uma Seguru, Washington, Estadu Unidu Amérika

Hodi ramata vizita bá iha Estadus Unidus Amérika, S.E. Sra. Rodrigues no delegasaun vizita Aliansa Distritu bá Uma Seguru iha Washington, D.C., hodi bele hare’e ho matan rasik organizasaun inovadóra ne’ebé fó asesu bá vítima violénsia doméstika no seksuál atu bele hetan hela fatin no rekursu seluk uma nian.

Segunda Konferénsia Mundial kona-ba Hela Fatin bá Feto Sira halao iha Washington D.C., Estadus Unidus Amérika halibur hamutuk ema 1,300 hosi nasaun 95 hosi mundu tomak.