» Notisias

Segunda, 26 November 2012

Kampaña Loron 16 Aktivismu Kontra Violénsia Hasoru Feto, "Hamutuk Ita Hapara Diskriminasaun no Violénsia Hasoru Feto"

Governo Timor-Leste liu husi Sekretaria Estadu ba Promosaun Igualdade hala’o Kampaña Loron 16 Aktivismu Kontra Violénsia Hasoru Feto, ne’ebe hahu iha suku Manleuana, Dili iha loron 26 fulan Novembru no sei taka iha area fronteira Batugade iha loron 7 fulan Dezembru 2012.

Tema ba Kampaña ne’e “Hamutuk Ita Hapara Diskriminasaun no Violénsia Hasoru Feto.” Tema ne’e hili ho objetivo atu promove komunidade nia partisipasaun ba halakon forma oi-oin violénsia bazeia ba jéneru, ne’ebe maioria husi vitima mak feto sira.

“Objetivu husi kampaña ne’e mak atu hasae koñyesementu iha nível local no nasionál kona-ba violensia bazeia ba jeneru, hakbiit rede local no fornese forum ba dialogu no partilha estratejia ba halakon violénsia bazeia ba jéneru,” tenik Sekretaria Estadu ba Promosaun Igualdade Sra. Idelta Maria Rodrigues.

Liu husi kampaña ne’e, Governu Timor-Leste hakarak hakbiit esforsu ba halakon violénsia bazeia ba jénerune’ebe Governu, organizasaun sosiedade sivil, no parte sira seluk hala’o. Iha kampaña ne’e, ita sei konsentra no esforsu hodi kria konsiensializasaun ne’ebe bo’ot liu husi dialogu no sosializasaun, nu’udar oportunidade ba ita atu refleta,”tenik Sra. Idelta Maria Rodrigues.

Lansamentu ba Kampaña Loron 16 Aktivismu Kontra Violénsia Hasoru Feto ne’e, SEPI hala’o hamutuk ho Grupu Traballo Jéneru Distritu Dili. Ema notável sira sei hato’o sira nia mensajen, hanesan reprezentante organizasaun Nasoens Unidas iha Timor-Leste Sr. Finn Reske-Nielsen no prezidente Grupu das Mulheres Parlamentares de Timor-Leste. S.E. Deputada Josefa Alvares Soares Pereira. Sekretaria Estadu ba Promosaun Igualdade S.E. Sra. Idelta Maria Rodrigues hato’o ninia palestra no Administrador Distritu Dili Sr. Gaspar Soares hato’o lia menon kona-ba komunidade nia papel ba halakon violénsia bazeia ba jéneru.

Aktividade hirak ne'ebe halao iha lansamentu ne’e. Sekretaria Estadu ba Promosaun Igualdade Sra. Idelta Maria Rodrigues sei entrega ofisialmente Lista Grupu Traballo Jéneru Distritu Dili ba Prezidente Grupu ne’e. Dialogu ho komunidade sira sei hala’o ho Primeira Dama Timor-Leste S.E. Sra. Isabel Fereira no mós Sra. Idelta Maria Rodrigues. Dialogu ne’e nia objetivu mak atu hasae koñesementu komunidade kona ba problema violénsia bazeia ba jéneru, liu-liu violénsia doméstika no oinsa ema ida-idak no komunidade sir abele kontribui ba halakon violénsia ne’eliu husi prevensaun no fó apoiu ba vitima sira.

Iha okaziaun ne’e, SEPI mos fahe sasan kampaña hirak hanesan guarda-chuva (paying), faru, bandeirolas, no mós boletim. Objetivu husi fahe sasan ne’e mak atu sensibiliza povu sira kona-ba oinsa halakon violénsia bazeia ba jéneru ne’ebe nu’udar problema seriu iha ita nia rai doben Timor-Leste.

Hotu tiha aktividade iha Manleuana, Sekretaria Estadu ba Promosaun Igualdade hala’o lansamentu poster bo’ot iha Jardim Rosa Muki Bonaparte, iha area Mandarin, Dili. Poster bo’ot ne’e nia tema mak “ Uma nu’udar fatin ba komunikasaun, laos ba halo violénsia”.

Abertura ba atividade Kampaña Loron 16 Ativismu Kontra Violénsia Hasoru Feto sei halo iha Fronteira Batugade. Tuir planu, SEPI sei konvida maluk sira ne’ebe sei hela iha rai Timor Barat, Indonezia atu hola parte. Objetivu espesifiku ba atividade iha fronteira mak atu haburas dame no hakbiit relasaun diak entre maluk sira ne’ebe sei hela iha rai Timor Barat ho maluk feto sira iha Timor-Leste.

Atividade kampaña Loron 16 Ativismu Kontra Violénsia Hasoru Feto iha tina 2012 ne’e hetan apoiu husi orgaun Nasoens Unidas rua, hanesan: UN Women (Entidade Nasoens Unidasba Igualdade Jéneru no Hakbiit Feto) no UNFPA (Fundu Nasoens Unidas ba Populasaun).

Kampaña Loron 16 Ativismu Kontra Violénsia Hasoru Feto ne’ebe tina-tinan Timor-Leste organiza maka parte ida husi kampaña iha mundutomak hodi hasa’e koñesementu kona-ba problema violénsia hasoru feto no oinsa atu halakon violénsia ne’e. Ideia atu organiza Kampaña Loron 16 Ativismu Kontra Violénsia Hasoru Feto mosu iha 1991 bainhira reprezentante nain23 husi mundu tomak hala’o sorumutu iha Women’s Leadership Institute (Institutu Lideransa Global Feto nian) iha Universidade Rutgers, Estadus Unidus Amerika. Sira disidi atu organiza kampaña komesa husi loron 25 fulan Novembru, ne’ebe hanesan Loron Internasional Kontra Violénsia Hasoru Feto to’o loron 10 fulan Dezembru, ne’ebe hanesan Loron Internasional Direitu Umanu, tanba durante period ne’e iha loron barak mak importante.

Mensajen sentral husi kampaña ne’e maka: direitu feto nian mak direitu umanu no violénsia hasoru feto mak violasaun ba direitu umanu. Rekoñese katak violénsia hasoru feto afeita ba populasaun barak husi rai, rasa ,classe, kultura no relijiaunhotu-hotu, Kampaña Loron 16 fó oportunidade ba ema hotu-hotu atu servisu hamutuk iha solidariedade no dada atensaun durante periode ida ne’e para hetan suporta ba sira nia esforsu local atu halakon violénsia bazeia ba jéneru. Agora Kampaña Loron 16 Ativismu Hasoru Feto hala’o kada tinan iha nasaun hamutuk 172.


Departamentu Media SEII | Author : Nug
Loron Boot SEPI
Loron Internasionál Feto RuráL
Loron Nasionál Feto Timor-Leste
Kampaña Loron 16 Ativismu Kontra Violénsia Hasoru Feto
Loron Internasionál Feto
Arkivu
Statistika Vizitantes

00666787

Ohin loron : 92
Hits ohin loron : 1020
Total : 123333
Hits : 666787
Online : 2