» Notisias

Sesta, 19 Juli 2013

SEPI Fó Ajuda Finanseira ba Grupu 70

Sekretaria Estadu ba Promosaun Igualdade (SEPI) fó ajuda finanseira husi fundu Transferénsia Públika ba grupu hamutuk 70 husi distritu 13 hodi hakbiit sira iha área ekonomia. Montante orsamentu ne’ebé SEPI fó ba kada grupu kiik liu mak US$ 1.500 no boot liu mak US$ 3.000.

Ohin loron 18 fulan Jullu 2013 koordenador/koordinadora husi grupu sira ne’e mai partisipa iha reuniaun hodi asina karta akordu ne’ebé deskreve sira-nia responsabilidade.

Iha eventu ne’e, SEPI representa husi Sr. Gregório Guterres husi Departamentu Finansas hato’o katak osan ne’ebé SEPI fó ba grupu sira ne’e mai husi Orsamentu Jerál Estadu. “Ita bo’ot sira tenke uza osan ne’e tuir planu ne’ebé ita bo’ot sira hato’o iha proposta. La bele uza ba selu barlake ka halo lia. Ami sei halo monitorizasaun ba grupu nia atividade,” katak Sr. Gregório Guterres. Osan ne’ebé fó ba kada grupu ninia montante kiik liu ida ne’ebé husu husi grupu sira. “Karik ita bo’ot laran todan, di’ak liu lalika simu. Para osan ne’e ami bele fó ba grupu seluk ne’ebé presiza,” tenik Sr. Gregório Guterres.

Sr. Gregório Guterres mós esplika kona-ba responsabilidade ba grupu sira, katak sira tenke gasta osan husi SEPI hanesan planu ne’ebé sira hato’o iha proposta. Grupu sira mós tenke hato’o relatóriu narativu hamutuk ho fotokopia husi saldu konta bankaria. Sr. João Lino husi Departamentu Monitorizasaun no Avaliasaun SEPI hato’o katak husi SEPI nia monitorizasaun ba grupu ne’ebé simu ajuda finanseira iha tinan hirak liu ba, hatudu katak iha difikuldade ba programa ne’e. Grupu balu nia enderesu ne’ebé hakerek iha proposta la hanesan realidade, grupu balu ne’ebé aplika husi distritu maibe sira nia membru hela iha kapital Dili, grupu balu la koñesidu, xefe suku ka xefe aldeia mós la hatene. “Ami husu ba ita bo’ot sira la halo hanesan grupu sira ne’e,” katak João Lino.

“Aleinde halo monitorizasaun, ami mós sei halo esforsu hodi apoiu grupu sira liu husi formasaun ka treinamentu relevante, hanesan kona-ba jerensia no kapasitasaun produsaun. Karik imi nia enderesu ka númeru kontaktu la loos, ami la bele kontaktu ita boot. Ne’e ita boot mak lakon,” aumenta Gregório Guterres.

Hahú husi tinan 2008 SEPI hala’o programa Transferénsia Públika ho objetivu atu promove igualdade entre feto no mane iha setór ekonomia liu husi haburas independénsia ekonómiku feto sira. Ho programa ne’e feto hamutuk ho mane sira bele dezenvolve atividade ruma ba hasa’e sira-nia kapasidade ekonómika ne’ebé kontribui ba hamenus ki’ak no ba dezenvolvimentu Timor-Leste.


Departamentu Media SEII | Author : Nug
Loron Boot SEPI
Loron Internasionál Feto RuráL
Loron Nasionál Feto Timor-Leste
Kampaña Loron 16 Ativismu Kontra Violénsia Hasoru Feto
Loron Internasionál Feto
Arkivu
Statistika Vizitantes

00667537

Ohin loron : 189
Hits ohin loron : 1770
Total : 123430
Hits : 667537
Online : 3