» Notisias

Kuarta, 18 Februari 2015

Entrega Servisu husi Sekretária Estadu ba Promosaun Igualdade ba Sekretária Estadu ba Apoiu no Promosaun Sósiu-Ekonómika Feto

Sekretaria Estadu ba Promosaun Igualdade hala’o entrega servisu husi Sekretária Estadu ba Promosaun Igualdade Sra. Idelta Maria Rodrigues ba Sekretária Estadu ba Apoiu no Promosaun Sósiu-Ekonómika Feto Governu Konstitusionál VI Sra. Veneranda Lemos iha Salaun Maria Gorete, edifisiu SEPI, Eis Obrigado Barracks, Dili, 18 Fevereiru 2015. Iha eventu ne’e, Sra. Veneranda Lemos simu husi Sra. Idelta Maria Rodrigues hamutuk ho Diretora Jerál Sra. Maria José Sanches, Diretór Nasionál Polítika Dezenvolvimentu Jéneru Sr. Henrique da Silva, Diretora Nasionál Administrasaun no FInansas Sra. Benigna Maria Amaral, Xefe Departamentu sira, funsionáriu/a tomak no Asesor/a sira hotu. Partisipa mós Presidente Board Rede Feto Timor-Leste no reprezentante organizasaun balu membru Rede ne’e.

Iha ninia palestra, Sra. Idelta Maria Rodrigues hato’o progresu ne’ebé SEPI hetan tiha ona durante tinan hitu (Governu Konstitusionál V no Governu Konstitusionál VI), dezafiu ne’ebé hasoru, no servisu ne’ebé planeadu ona atu hala’o. Progresu balu ne’ebé Sra. Idelta Maria Rodrigues hato’o mak hanesan aprezentasaun Relatóriu CEDAW iha Komité CEDAW, kolaborasaun ne’ebé hala’o ho Portugal no Indonesia, presenza Timor-Leste iha nivel rejionál no internasionál kona-ba promosaun igualdade hanesan iha Movimentu Nasoens Não-Aliñadu (Non-Aligned Movement), Konferénsia Ministra Igualdade CPLP, UN ESCAP, no Komisaun ba Status Feto (UN Commission on the Status of Women). Timor-Leste mós hetan susesu ba kandidatura iha Komité CEDAW ho rezultadu Sra. Milena Pires sai nu’udar membru ka peritu iha Komité ne’e durante tinan 2011-2014. Tinan kotuk Timor-Leste kandidata Juiza Tribunál Rekursu Sra. Maria Natercia Gusmão ba posizaun Juiz iha Tribunál Kriminál Internasionál iha sidade Den Haag. Maske la konsege eleitu, Sra. Maria Natercia Gusmão konsege to ronde ikus liu (ronde 22) kompete ho juiz/a husi nasaun dezenvolvidu sira.

Atividade importante ne’ebé tuir planu SEPI sei hala’o iha tinan 2015 ne’e maka aprezentasaun Relatóriu Periódiku CEDAW ba Komité CEDAW iha Organizasaun Nasoens Unidas, iha sidade Jenebra, rai Suiça, aprezentasaun progresu promosaun igualdade ba iha Komisaun Status Feto, iha ONU Nova Yorke, no apoiu ba feto sira hodi prepara ba eleisaun Munisípiu.

Sra. Idelta Maria Rodrigues mós husu ba funsionáriu hotu no mós organizasaun sosiedade sivil sira atu fó apoiu makaas ba Sra. Veneranda Lemos nu’udar feto Timor-Leste ne’ebé asume kargu nu’udar Sekretária Estadu ba Apoiu no Promosaun Sósiu-Ekonómika Feto.

Iha ninia palestra, Sra. Veneranda Lemos esplika katak mudansa husi SEPI ba Sekretaria Estadu ba Apoiu no Promosaun Sósiu-Ekonómika sei la muda programa ne’ebé planeadu ona husi SEPI. “Programa sira ne’e sei la’o nafatin, só aumenta deit ho programa apoi ba feto para bele hakbiit sira iha área sosial no ekonomia,” katak nia. Sekretária Estadu foun ne’e mós agradese ba Sra. Idelta Maria Rodrigues ne’ebé halo barak liu ona ba promosaun igualdade entre feto no mane iha Timor-Leste no hala’o advokasia ba iha nivel rejionál no internasionál.

Iha okaziaun ida ne’e mós Sra. Idelta Maria Rodrigues entrega dokumentus barak kona-ba servisu ne’ebé hala’o ona, inklui Relatóriu CEDAW Daruak no Datoluk, Matadalan Orsamentu Sensivel Jéneru, Análiza ba Orsamentu Jerál Estadu 2015, Avaliasaun Jéneru Nivel Nasaun Timor-Leste, Relatóriu Plataforma Beijing +20, no seluk-seluk tán. Iha sira-nia parte, Rede Feto Timor-Leste ne’ebé reprezenta husi sira-nia Presidente Board Sra. Ivete Oliveira, fundadora Sra. Merita Alves, no membru Sra. Beba Sequeira no Sra. Paula Corte-Real hato’o agradesimentu ba Sra. Idelta Maria Rodrigues no bem-vindu ba Sra. Veneranda Lemos. Rede Feto mós entrega livru kona-ba Movimentu Feto Timor-Leste ne’ebé hakerek husi Sra. Laura Abrantes nu’udar ninia disertasaun mestradu iha universidade ida iha Brazil.


Departamentu Media SEII | Author : Nug
Loron Boot SEPI
Loron Internasionál Feto RuráL
Loron Nasionál Feto Timor-Leste
Kampaña Loron 16 Ativismu Kontra Violénsia Hasoru Feto
Loron Internasionál Feto
Arkivu
Statistika Vizitantes

00665568

Ohin loron : 86
Hits ohin loron : 2235
Total : 123222
Hits : 665568
Online : 3