» Notisias

Sesta, 24 April 2015

Haforsa kolaborasaun entre SEM ho Organizasaun Naun-Governamentál sira

Organizasaun naun-governamentál nia knaar importante loos ba atinje Sekretaria Estadu ba Apoiu no Promosaun Sosiu-Ekonómika Feto (SEM) nia objetivu atu realiza igualdade entre feto ho mane iha rai doben Timor-Leste. Tanba ne’e ba hala’o ninia mandatu, SEM envolve organizasaun naun-governamental (ONG) sira ne’ebé haknaar iha área relevante.

Atu haforsa kolaborasaun entre SEM ho ONG sira, iha loron 24 fulan Abril 2015, SEM hala’o enkontru iha Salaun Maria Gorete. Sorumutuk ne’e nia objetivu mak oin tolu:
a) Haree problema no difikuldade ne’ebé ONG sira hasoru durante hala’o servisu hamutuk ho SEM;
b) Fundu Transferénsia Públika ba ONG sira;
c) Identifika misaun no atividade ONG sira hodi kompleta SEM nia mapamentu.
Partisipa iha sorumutuk ida ne’e maka ONG sira ne’ebé simu apoiu Fundu Transferénsia Públika iha tempu SEPI (Sekretaria Estadu ba Promosaun Igualdade) no husi SEM maka Sekretária Estadu ba Apoiu no Promosaun Sosiu-Ekónomika Feto Sra. Veneranda Lemos, Diretora Nasionál Administrasaun & Finansas Sra. Benigna Maria Amaral, no Xefe Departamentu Ligasaun Sra. Odilia Martins Ung.

Iha sorumutuk ida ne’e, SEM esplika katak atu simu Fundu Transferénsia Públika, entidade privada si tenke halo rejistu ba iha Ministériu Justisa. Sira mos tenke asina kontratu ho orgauan ne’ebé tutela. Sei karik sira hala’o programa ne’ebé ninia orsamentu masi husi Fundu Transférensia SEM nian, tenke iha kontratu ka karta entendimentu entre ONG ne’e ho SEM. Pagamentu hotu-hotu tenke bazeia ba kontratu no sei halo ba konta bankaria entidade benefisiariu.

Molok atu halo prosesu pagamentu, tenke priense kritéria tuir mai ne’e: 1. Proposta husi ONG ka entidade privada sira seluk tenke hetan aprovasaun husi instituisaun tutela; 2. ONG ka entidade privada sira seluk tenke iha estatutu; 3. Iha ona Karta Entendimentu ne’ebé asina husi parte rua; 4. Konta bankaria, ne’ebé minimu ema na’in rua mak asina.

Iha SEM, prosesu ba Fundu Transferénsia Públika sei hala’o liu husi etapa tuir mai ne’e. Primeiru, ekipa avaliasaun sei halo avaliasaun ba proposta. Hotu tiha, ekipa ne’e hato’o rekomendasaun ba Diretora Nasionál Administrasaun & Finansas (DNAF SEM). Ba ONG sira ne’ebé sira-nia proposta hetan aprovasaun, sei asina Karta Entendimentu ho SeM. Departamentu Finansas SEM sei prepara CPV. Hafoin asina husi Sekretária Estadu, CPV ne’e sei haruka ba Ministériu Finansas, hodi hala’o transferénsia ba kanta bankaria husi organizasaun benefisiariu. Transferénsia ne’e sei hala’o dala rua, uluk 60% no restu 40% sei transfere hafoin SEM simu tiha relatóriu ezekusaun ba transferénsia dahuluk.

Ba atividade hotu ne’ebé hala’o ho orsamentu Fundu Transferénsia Públika, SEM iha dever atu hala’o monitorizasaun. SEM mós sei hala’o auditoria ba organizasaun benefisiariu sira wainhira presiza.

Iha sorumutuk ne’e, ONG sira hato’o sira-nia esperiénsia no observasaun. ONG balu hato’o katak buat balu diak no no buat balu presiza atu hadia. Tuir sira nia esperiénsia, transferénsia orsamentu sempre tarde no ida ne’e nia impaktu maka sira mós tarde hala’o implementasaun ba atividade.

Tuir reprezentante ONG sira, atividade apoiu ba vítima violénsia mak nesesidade ne’ebé urjente. Liu-liu uma mahon sira ne’ebé presiza hadia konstrusaun, hodi nune’e bele fo fatin nebe maka hakmatek ba vitima sira. ONG sira mós sujere ba SEM atu kontinua apoiu ba Asosiasaun Feto Munisípiu hotu-hotu, tanba uluk SEPI mak fó apoiu makaas ba feto sira atu harii asosiasaun sira hotu. Ikus liu, partisipante sorumutuk ne’e husu ba Sem atu aselera revizaun ba Planu Asaun Nasionál Violénsia Bazeia ba Jéneru, para bele define diak liután knaar no responsabilidade iha termus referénsia nia laran.

Husi rekomendasaun hirak ne’e, SEM sei elabora hamutuk ho ekipa tékniku atu bele kria mekanizmu servisu hamutuk hodi bele alkansa objetivu atu realiza igualdade jéneru.


Departamentu Media SEII | Author : Nug
Loron Boot SEPI
Loron Internasionál Feto RuráL
Loron Nasionál Feto Timor-Leste
Kampaña Loron 16 Ativismu Kontra Violénsia Hasoru Feto
Loron Internasionál Feto
Arkivu
Statistika Vizitantes

00666755

Ohin loron : 91
Hits ohin loron : 988
Total : 123332
Hits : 666755
Online : 2