» Notisias

Kinta, 23 Agustus 2012

Enkontru Preparasaun ba Orsamentu Planu Asaun Nasional (PAN) Violénsia Bazeia ba Jéneru (VBJ)

Iha loron 23 fulan Agostu tinan 2012 SEPI hala’o enkontru ba dahuluk kona-ba preparasaun orsamentu bazeia ba jéneru hamutuk ho Ministériu xave hotu mak hanesan Ministériu Solidaridade Sosiál, Ministériu Edukasaun, Ministériu Saúde, Ministériu Justisa no mós Prokuradoria Jerál Repúblika. Ministériu xave sira mak sei sai autór prinsipál ba implementasaun Planu Asaun Nasional (PAN) Violénsia Bazeia ba Jéneru. Husi parte parseiru sira mak hanesan husi UN Woman, UNFPA, Irish AID, UNICEF, Asia Foundation, no UNDP. Enkontru ne’ebé hala’o iha salaun Hotel Audian, Dili, ladun hetan partisipasaun husi Ministériu balun, tanba la marka presenza iha atividade ne’e.

Asuntu prinsipál husi enkontru ida ne’e hare liu oinsa PAN VBJ bele enkaisa iha programa Governu ba tinan 2013. Aleinde ne’e atu fahe informasun kona-ba programa sira ne’ebé tau ona iha PAN husi Ministériu xave ida-idak. Tanba iha mudansa barak ba iha V Governu Konstitusionál, no ema mós foun, tan ne’e liu husi enkontru ida ne’e importante liu fahe informasun ba malu.

Preparasaun ba PAN halao durante tinan 1, no husi preparasaun involve ona Ministériu relevante no hetan aprovasaun iha fulan Maiu tinan 2012. Rezolusaun ne’ebé aprova sei estabelese ekipa interministeriál no reprezentante husi sosiedade sivil atu sai hanesan komisaun interministeriál ba supervisaun no halo monitorizasaun ba implementasaun PAN. Komisaun ne’e sei hato’o relatóriu ba Parlamentu Nasionál no Konsellu Ministru tuir lei ne’ebé relevante.

Husi aprezentasaun ne’ebé hato’o husi Diretór Nasionál Polítika Dezenvolvimentu Jéneru SEPI Sr. Armando da Costa hateten katak kustu estimativu ne’ebé tau iha PAN sei dezenvolve iha tinan tolu nia laran tuir programa Ministériu xave ida-idak nian. Exemplu hanesan husi Ministériu Solidariedade Sosial (MSS) atu estabelese uma mahon rua (2), ida iha Maliana (Uma Mahon Maria Tapo) ne’ebé inaugura foin lalais ne’e, no iha tempu badak sei halo tán uma mahon ida iha Lospalos. Programa seluk mak hanesan atu fornese treinamentu multisetorál konselador kona-ba oinsa atu atende vítima sira iha uma mahon.

Iha enkontru ida ne’e Diretora Jerál Sekretariu Estadu ba Segurana (SES) Sra. Guilhermina Saldanha Ribeiro hato’o mós kestaun katak sei tau mós prioridade ba iha programa SES nian kona-ba VBJ liu-liu iha asuntu “abandona familiar”. Tuir SES nia programa hodi prevene korupsaun iha PNTL, halo ona kada fulan neen (6) rotasaun ba PNTL iha 13 Distritu. “Hodi nune’e bele prevene kazu violénsia doméstika liu husi poligamia ne’ebé realidade akontese barak iha terenu,” katak Sra. Guilhermina Saldanha Ribeiro.

Husi Ministériu xave sira nia programa totál orsamentu ba tinan 2013 nia kustu estimativu husi MSS: $ 724.618,00; Ministériu Saúde: $568.231,00; SEPI: $ 505.715,00; Ministériu Justisa: $ 415.477,00; SES: $ 168.769,00; Ministériu Edukasaun: $ 124.000,00 no Prokuradoria Jerál nia totál orsamentu $ 63.000,00. Fontes husi orsamentu ne’e primeiru mai husi Orsamentu Estadu, no sei hetan apoiu husi parseiru sira.


Departamentu Media SEII | Author : Chyqa dZouza
Loron Boot SEPI
Loron Internasionál Feto RuráL
Loron Nasionál Feto Timor-Leste
Kampaña Loron 16 Ativismu Kontra Violénsia Hasoru Feto
Loron Internasionál Feto
Arkivu
Statistika Vizitantes

00665922

Ohin loron : 20
Hits ohin loron : 155
Total : 123261
Hits : 665922
Online : 2