» Notisias

Tersa, 01 Desember 2020

SEII HAMUTUK KOMUNIDADE POSTU LURO KOMEMORA LORON NASIONÁL FETO TIMOR-LESTE BA DALA 45

LURO, LAUTEM--03/11/2020-S.E. Sekretária Estadu ba Igualdade no Inkluzaun Sra. Maria José da Fonseca Monteiro de Jesus inklui membru governu no membru Parlamentu Nasionál hamutuk ho Autoridade Munisípiu no komunidade Postu Administrativu Luro komemora loron Nasionál Feto Timor-Leste ba dala 45 ho tema “Promove Partisipasaun Feto iha Nivel Foti-Desizaun hodi Lidera ba Mudansa Inkluziva”, no atividade ne’e hala’o iha suku Luro.

Sekretária Estadu iha okaziaun ne’e hateten katak, ita hotu presiza kontinua promove maluk feto sira ba iha nivel lideransa nian, tanba, bainhira maluk feto sira ba tuur iha kargu foti-desizaun sira bele asegura mudansa iha ita-nia sosiedade ne’ebé inkluzivu atu ema hotu bele partisipa ativa no hetan benefísiu hanesan hosi programa governu nian ne’ebé oferese ba timór-oan.

“Ita hatene katak, iha timór-laran tomak feto no labarik feto sei nafatin sai vítima no hetan diskriminasaun oioin, ita lakohi tan ona ema ida sai vítima ba violénsia iha ita-nia sosiedade no ida-ne’e sai responsabilidade ita hotu nian atu asegura laiha ema ida hosi ita maka fó oportunidade ba ema ruma atu halo violénsia hasoru ema seluk no timór-oan hotu iha direitu hanesan atu hetan tratamentu hanesan, labele tan ona ema ida sente la seguru iha nia uma-rasik”, Governante ne’e hatutan.

Iha sorin seluk, Administradór Munisípiu Lautem, Sr. Zeferino dos Santos Sequeira, hateten katak, iha ita-nia konstituisaun hateten katak, partisipasaun maluk feto sira iha nivel foti-desizaun tuir ona nia kuota liuliu iha parlamentu nasionál, ne’e katak, estadu respeita tebes maluk feto sira atu foti desizaun no kontribui ba dezenvolvimentu nasionál.

Atu informa mós katak, atividade ne’ebé hala’o durante iha komemora loron nasionál feto Timor-Lesta mak hahú ho misa ba loron nasionál feto Timor-Lesta, karii ai-funan iha jardim kombatente erois da pátria, teatru no dansa tradisionál no iha mós sesaun husu no hatán entre membru governu no membru parlamentu hirak ne’ebé partisipa ho komunidade sira kona-ba asuntu igualdade no inkluzaun.

Komemorasaun ne’e partisipa hosi, reprezentante GMPTL Distinta deputadu Sra. Maria Sabio, Prezidente Komisaun F Distintu deputadu, Sr. Noe da Silva ’Buka Tuir’, Ministru MAPKOMS Sr. Francisco Martins da Costa Pereira Jerónimo, Vise Ministru Justisa, Sr. José Edmundo Caetano, Reprezentante veterana munisípiu Lautem, komandante PNTL munisípiu lautem, F-FDTL no komunidade postu Luro.


Departamentu Media SEII | Author : Média SEII
Loron Boot SEPI
Loron Internasionál Feto RuráL
Loron Nasionál Feto Timor-Leste
Kampaña Loron 16 Ativismu Kontra Violénsia Hasoru Feto
Loron Internasionál Feto
Arkivu
Statistika Vizitantes

00666378

Ohin loron : 74
Hits ohin loron : 611
Total : 123315
Hits : 666378
Online : 3