» Notisias

Sabadu, 03 November 2012

Selebrasaun Loron Nasionál Feto iha Atabae

Governu liu husi Sekretaria Estadu ba Promosaun Igualdade hala’o selebrasaun ba Loron Nasionál Feto Timor-Leste iha Subdistritu Atabae, Distritu Bobonaro. Loloos Loron Nasionál Feto mak loron 3 fulan Novembru, maibé tanba loron 2 Novembru ema barak hala’o atividade Loron Matebian, selebrasaun Loron Feto Nasionál ba tinan ida ne’e hala’o iha loron 8 fulan Novembru.

Komemorasaun ba tinan 2012 ne’e espesiál tanba primeira vez atividade komemorasaun nível nasionál ba Loron Nasionál Feto halao iha área rural. “Objetivu ba hala’o iha área rural mak atu fasilita partisipasaun komunidade rurais ba komemorasaun Loron Nasionál Feto Timor-Leste,” hatete Sekretária Estadu ba Promosaun Igualdade Sra. Idelta Maria Rodrigues.

Tema ba selebrasaun tinan ida ne’e mak “Partisipasaun Feto iha Resistensia no Tempu Ukun Rasik An.” Tema ne’e hili atu fo valor ba luta husi maluk feto sira ba independensia nasionál ne’ebé sei presiza kontinua ho oin foun iha tempu agora ukun rasik an ne’e tanba mehi barak mak seidauk realiza. “Tema ne’e mós hili atu promove parte hotu nia hanoin no konsiensia, liuliu ba komunidade, kona-ba importansia promosaun igualdade jéneru no haberan feto nia papel ba dezenvolve sira-nia an no ba sira-nia komunidade,” tenik Sra. Idelta Maria Rodrigues.

Iha selebrasaun ne’e, SEPI organiza diskusaun ho tema “Papel Feto iha Dezenvolvimentu”. Diskusaun ne’e sei halao entre Parlamentu Foin-sa’e, grupu feto sira iha Subdistritu Atabae no komunidade jerál. Orador ba diskusaun ne’e mak Membru Parlamentu Foin-sa’e no Membru Konsellu Suku. Tuir Diretora interinu ba Dirasaun Nasionál Polítika Dezenvolvimentu Jéneru Sra. Maria Filomena Babo Martins mak atu promove juventude nia partisipasaun iha programa promosaun igualdade. “DIskusaun públiku ne’e sei fasilita husi SEPI no juventude husi Atabae nu’udar dalan ida atu motiva sira atu buka hatene partisipasaun feto iha dezenvolvimentu nasionál,” tenik Sra. Maria Filomena Babo Martins.

Atividade importante ida tan ba selebrasaun ne’e mak sasin husi feto nain rua ne’ebé luta husi tempu Resisténsia to’o ukun rasik an agora. Hili feto nain rua ne’ebé envolve iha luta ba ukun rasik an iha pasadu atu hato’o sira-nia sasin kona-ba sira-nia partisipasaun iha luta ba ukun rasik aan. Ne’e atu loke fail komunidade nia hanoin kona-ba feto nia papel ba sosiedade ne’ebé halao husi tempu uluk no ninia valor ne’ebé relevante ba tempu ukun rasik an agora.

Iha selebrasaun ne’e m’os sei halo jogu amizade bola volley, kari aifunan iha tasi, aprezenta filme kona-ba SEPI nia atividade no filme sira seluk relevante ho asuntu igualdade jéneru no papel feto iha sosiedade nia laran. SEPI mós sei fahe livru kiik oan “Grupu Traballu Jéneru Nível Nasionál no Distritál: Rezolusaun Governu No. 27/2011 No Lista Nomeasaun” ba Membru Grupu Traballu Jéneru no fahe boletin Ta’es ba públiku sira no halao lansamentu Prosedimentu Operasional Padraun (POP) Dalam Rereral ba Violénsia Bazeia ba Jéneru, Jestaun no Keleksaun Dadus ba Violénsia Doméstika no Violénsia Bazeia ba Jéneru, no Orientasaun Téknika Estabelesimentu no Jestaun Sentru Resepsaun no Uma Mahon ba Vítima VBJ.

Atividade selebrasaun ne’e sei hetan partisipasaun husi Membru Governu, Membru Parlamentu Nasionál, reprezentante UNMIT, Grupu Traballu Jéneru, reprezentante PNTL, Administrador Distritu no Administrador Subdistritu ho espoza, estudante sekunária no pre-sekundária Subdistritu Atabae, profesor no profesora sira-nia fen/laen, partaeira sira, xefe suku sira ho espoza.

Aleinde halo selebrasaun iha Atabae, Governu mós haruka feto sira Membru Governu ba distritu hodi selebra Loron Nasionál Feto. Tuir lista alokasaun, Ministra Finansas Sra. Emilia Pires ba halo selebrasaun iha Distritu Liquiça; Ministra Solidariedade Sosiál Sra. Isabel Amaral Guterres ba Viqueque; Vise Ministra Saúde Sra. Maria do Céo da Costa ba Distritu Lospalos; Vise Ministra Saúde ba Etika e Prestasaun Servisu Sra. Natalia de Araújo sei ba Ainaro; Vise Ministra Ensinu Báziku Sra. Dulce de Jesus Soares sei ba Covalima; Sekretária Estadu ba Apoiu Promosaun Setór Privadu Sra. Veneranda M.E.L. Martins ba Oecusse.

Timor-Leste hili loron 3 fulan Novembru nu’udar Loron Nasionál Feto tanba iha loron ida ne’e tinan 1975, feto Timor-Leste ida naran Maria de Tapo hatudu ninia hahalok ne’ebé heroico duni hodi defende rai Timor-Leste no direitu povo ba independensia. Iha loron ida ne’e iha área fronteira, Maria de Tapo tiru malu to’o mate hasoru tropas invasores ne’ebé mai dadauk halo invasaun hodi okupa rai Timor-Leste.


Departamentu Media SEII | Author : Nug
Loron Boot SEPI
Loron Internasionál Feto RuráL
Loron Nasionál Feto Timor-Leste
Kampaña Loron 16 Ativismu Kontra Violénsia Hasoru Feto
Loron Internasionál Feto
Arkivu
Statistika Vizitantes

00665416

Ohin loron : 66
Hits ohin loron : 2083
Total : 123202
Hits : 665416
Online : 3