» Notisias

Kuarta, 12 Maret 2014

Workshop kona-ba Media ho Perspetivu Jéneru

Sekretaria Estadu ba Promosaun Igualdade (SEPI) hamutuk ho Sekretaria Estadu ba Komunikasaun Sosial (SEKOMS), Centro de Formação Técnica em Comunicação (CEFTEC) Paz y Desarollo (PyD) hala'o workshop kona-ba Media ho Perspetivu Jéneru. Atividade ne'e hala'o iha loron Kuarta-Feira, 12 Marsu 2014, oras tuku 8.30-14.30, iha Salaun Konferénsia Timor Plaza (Andar 4).

Objetivu husi workshop ne’e mak atu hakbiit kapasidade media sira ba halo kobertura ba asuntu relevante ho promosaun igualdade iha Timor-Leste. “Workshop ne’e nu’udar meius ida atu aumenta sensibilidade ema ne’ebé servisu iha media kona-ba igualdade jéneru,” katak Sekretária Estadu ba Komunikasaun Sosial Sr. Nélio Isaac.

Husi perspetiva SEPI, atividade ne’e mak parte ida husi esforsu hodi muda ema nia hanoin konaba igualdade jéneru. “SEPI nu’udar instituisaun Governu ho mandatu promove igualdade jéneru iha área hotu-hotu iha Timor-Leste, iha Planu Estratéjiku ba 2012-2018 define nu’udar objetiu ida maka ‘Aumenta nível koñesimentu jéneru ba parte interezada sira no públiku jerál iha nível nasionál no lokál’ (Objetivu Estratéjiku 4),” katak Sekretária Estadu ba Promosaun Igualdade Sra. Idelta Maria Rodrigues.

Iha workshop ne’e, Membru Governu, Parlamentu Nasionál, media, no organizasaun naun-governamental sei hato’o sira-nia perspetiva. Sekretária Estadu ba Promosaun Igualdade Sra. Idelta Maria Rodrigues sei sai nu'udar orador kona-ba Media Sensivel Jéneru. Sekretáriu Estadu ba Komunikasaun Sosial Sr. Nelio Isaac Sarmento sei hato'o kona-ba Papel SEKOMS hodi Hakbiit Kobertura Igualdade Jéneru. Presidente Parlamentu Nasionál Sr. Vicente Guterres sei ko'alia kona-ba Direitu Feto ho Mane hodi Asesu ba Informasaun.

Reprezentante ida husi Centro de Formação Técnica em Comunicação (CEFTEC) sei aprezenta kona-ba Importansia ba Asuntu Sosial Sira, Igualdade Jéneru ba Área Formasaun iha Komunikasaun. Husi organizasaun naun-governamental, Diretór Asosiasaun HAK Sr. Manuel Monteiro sei hato'o aprezentasaun kona-ba Media Nia Papel hodi Kontribui ba Direitu ba Informasaun. Paz y Desarollo (PyD) sei hato'o aprezentasaun kona-ba Papel Media hodi Kontribui ba Mudansa Hahalok.

Husi media, ema nain hat sei hato'o aprezentasaun. Sira ne'e mai husi jornal Dili Weekly, televisaun RTTL, rádio RTK no media online Sapo.tl. Sira sei aprezenta kona-ba sira-nia esperiénsia relasiona ho igualdade jéneru.

Komisaun Organizadora konvida partisipante hamutuk ema na’in atus ida lima nulu (150), ne’ebé kompostu husi jornalista media imprimi, televisaun, on-line, no rádio (inklui rádio komunidade), media officers, no organizasaun naun-governamental relevante. Konvida mós Membru Governu balu, Membru Parlamentu balu liu-liu husi Grupo das Mulheres Parlamentares de Timor-Leste (GMPTL), no ajénsia internasionál relevante.


Departamentu Media SEII | Author : Nug
Loron Boot SEPI
Loron Internasionál Feto RuráL
Loron Nasionál Feto Timor-Leste
Kampaña Loron 16 Ativismu Kontra Violénsia Hasoru Feto
Loron Internasionál Feto
Arkivu
Statistika Vizitantes

00667650

Ohin loron : 203
Hits ohin loron : 1883
Total : 123444
Hits : 667650
Online : 4