» Notisias

Segunda, 26 Oktober 2015

Asinatura Kontratu Grupu Benefisiariu

Nu’udar implementasaun ba programa Hakbiit Ekonomia Feto, Sekretaria Estadu ba Apoiu no Promosaun Sosiu-Ekonómiku Feto (SEM) iha loron 26 Outubru 2015 asina kontratu ho grupu benefisiariu 10 (sanulu). Asinatura ne’e hala’o iha Salaun Maria Gorete, SEM, eis-Obrigado Barracks, Caicoli, Dili.

Grupu sanulu ne’ebé simu apoiu finanseiru husi Fundu Transferénsia Públik ne’e maka hanesan: Feto Halibur (Natarbora), Biqueli Ana (Ataúro), Salaun Beleza, AHISAN, Concelho Pastoral Vila-Verde Katedral, Eno Naek Ambeno (Oecusse), Kooperativa Centro Cafe (Ermera), Haburas Feto (Manufahi), CCRH (Clibur Comunidade Ratma Habuaras) Aileu, no Grupu Feto Mesak (Bairro Pite, Dili).

Kada grupu simu fundus ho montante la hanesan. Fundus ne’e sei transfere dala rua: 40% hahú transfere bainhira asina kontratu no 60% transfere ba dala ikus. Transferénsia sei realiza tuir konta bankaria grupu benefisiairiu. Transferénsia sei hala’o finál iha fulan Novembru 2015.

Ajuda finanseiru husi SEM fó ba grupu sira ho kondisoens: 1. Grupu tenke rejistu iha Ministériu Justisa; 2. Membru minimu na’in 5 no masimu na’in 10; 3. Benefisiariu tenke utiliza fundus tuir termu no kondisoens iha kontratu ne’e; 4. Regularmente hato’o relatóriu ba SEM no Administrasaun Munisípiu no nakloke ba supervizaun husi SEM no Administrasaun Munisípiu; 5. Tenke iha kontabilidade ne’ebe diak.

Hetan tiha fundus husi SEM, grupu sira tenke halo relatóriu kona-ba implementasaun sira-nia programa. Relatóriu hato’o kada fulan tolu dala ida ba SEM (liu husi Pontu Fokál SEM iha Munisípiu) no ba Administrasaun Munisípiu.

Iha programa ne’e SEM nia kna’ar mak halo: 1. SEM sei halao monitorizasaun no avaliasaun; 2. Formasaun teknika no jestaun tuir nesesidade; 3. Hapara transferénsia bainhira benefisiariu komete iregularidade tuir termu no kondisoens kontratu nomós hato’o denunsia ba Ministériu Públiku bainhira benefisiariu halo atus burla relasiona ho fundus transferénsia públika.

Monitorizasaun ba grupu benefisiariu sira sei hala’o regularmente husi Ekipa Monitorizasaun no Avaliasaun (husi SEM no Administrasaun Munisípiu) ne’ebé hala’o observasaun tuir relatóriu grupu benefisiariu. SEM mak prepara planu ba monitorizasaun no avaliasaun inklui koordena implementasaun monitorizasaun ho Administrasaun Munisípiu. Grupu benefisiariu sira tenke kolabora ho autoridade ka ofisiál sira ne’ebe hala’o kna’ar tuir kontratu ne’ebé asina ho SEM.

Atu fasilita ka apoiu grupu sira, SEM mós sei halo koordenasaun ho instituisaun relevante sira, hanesan Ministériu Komersiu, Indústria no Ambiente no Administrasaun Munisípiu. Programa Hakbiit Ekonomia Feto husi SEM ne’e hala’o bazeia ba Dekretu Governu Númeru 1/2009, ne’ebé hato’o katak: “Estadu maka iha kna’ar atu promove moris diak sosiál no ekonómiku populasaun nian no kualidade moris populasaun ne’e nian, liu-liu sira ne’ebé vulneravel liu.” Implementasaun ba kna’ar ne’e hala’o liu husi fó apoiu finanseiru husi Estadu ba setór ekonomika formal no naun formal.”

Dekretu Governu númeru 1/2009, iha art. 2 alinea a númeru 1 mós hateten katak: “Konsidera Subvensaun Públika montante finanseiru hot-hotu ne’ebé atribui liu husi Orsamentu Estadu, la haré ba dezignasaun ka modalidadi ne’ebé adopta ba setór públiku no privadu liu husi Orgaun Governu ne’ebé aloka dotasaun ne’e iha kategoria transferénsia públika,” no modalidadi sira subvensaun nian maka hanesan tuir mai ne’e: a) subvensaun ne’ebé maka hanesan kompensasaun ba prestasaun servisu sira ba interese jeral liu husi finansiamentu ba entidadi públiku no privadu sira.”númeru 1 artigu 17 husi Dekretu Governu No 1/2014, estabelese katak "Pedidu pagamentu ba subvensaun públika tenke bazeia ba Dekretu Governu No 1/2009.”