» Notisias
Kuarta, 09 Maret 2016
LORON INTERNASIONÁL FETO – 8 MARSU 2016
![](foto_nuticia/Loron_intFeto15.jpg)
Loron Internasionál Feto nuudar loron ida ne’ebé mundu tomak selebra hodi respeita no apresia realizasaun polítika, ekonómika no sosíal feto sira. Selebrasaun Loron Internasionál Feto hodi fó hanoin mós ba governu, ajénsia Nasoens Unidas (ONU) nian no sosiedade sivíl sira iha nasaun hotu-hotu hodi kontinua promove no luta ba igualdade entre feto no mane iha aspeitu hotu-hotu moris nian.
Loron Internasionál Feto ba tinan 2016 iha tema globál ne’ebé hasai iha ONU katak “Planet 50 – 50 by 2030, Step It Up for Gender Equality” (Planeta 50 – 50 iha 2030, Hamriik hodi Intensifika ba Igualdade Jéneru). Tema ne’e kria hodi reunifika lider nasaun hotu-hotu hodi selebra luta, konkista no dezafiu sira ne’ebé feto no labarik feto hasoru iha mundu tomak no hodi fó atensaun no apela ba governu hodi hapara dezigualdade jéneru no destaka progresu reál molok 2030. Selebrasaun ba tinan ne’e iha Timor-Leste, Governu liu husi Sekretaria Estadu ba Apoiu no Promosaun Sosiu-Ekónomika Feto (SEM) hasai mós tema nasionál ida hodi apela ba povu tomak atu “Hamutuk, Hametin no Haburas Igualdade Jéneru iha Timor-Leste.” Governu liu husi Sekretaria Estadu ba Apoiu no Promosaun Sosiu-Ekónomika Feto hamutuk ho nia parseiru, Asosiasaun Feto sira iha Munisípiu, Sosiedade Sivíl no Ajénsia ONU sira sei selebra Loron Internasionál Feto, 8 Marsu iha Postu Administrativu Natarbora, Munsípiu Manatuto. Tinan-tinan, Governu liu husi SEM sempre selebra loron boot sira ba feto iha área rurál hanesan Loron Internasionál Feto 8 Marsu, Loro Internasionál Feto Rurál 15 Otubru no Loron Nasionál Feto 3 Novembru. Atividade prinsipál sira iha selebrasaun 8 Marsu iha Natarbora mak sei fahe informasaun kona-ba Objetivu Dezenvolvimentu Sustentavel (ODS) husi S.E Ministro de Estado Coordenador dos Assuntos Sociais e Ministro da Educação (MECAS) Sr. Antonio da Conceição no kuda Ai-oan hamutuk 17 ba Meta númeru 5 ODS. Iha mós atividade sira seluk hanesan fahe informasaun kona-ba Observasaun Finál CEDAW husi S.E Sekretária Estadu ba Apoiu no Promosaun Sosiu-Ekonómika Feto Sra. Veneranda Lemos, Papél Grupo das Mulhers Parlementares de Timor-Leste (GMPTL) ba Observasaun Finál CEDAW husi Distinta Deputada Sra. Florentina Smith, Papél Sosiedade Sivíl atu Monitoriza Implementasaun Observasaun Finál CEDAW husi Prezidente Board Rede Feto Sra. Judith Ximenes no fahe informasaun kona-ba Preparasaun Feto Potensiál ba Eleisaun Suku 2016 husi Diretora Caucus, Sra. Paula Corte Real. Ba Sesaun sira ne’ebé temi iha leten, sei iha sesaun Husu no Hatan ne’ebé fó opotunidade ba partisipante sira atu hato’o sira nia hanoin. Eventu prinsipál ikus maka, sei iha lansamentu ba Relatóriu Rezultadu Avaliasaun Planu Asaun Nasionál Violénsia Bazeia ba Jéneru (PAN VBJ) 2012 -2014 husi SEM ne’ebé públika iha 2016. Eventu Seleberasaun Loron Internasionál Feto, 8 Marsu 2016 iha Postu Administrativu Natarbora sei hala’o iha loron ida nia laran.Departamentu Media SEII | Author : Carlito Caminha
Agenda
9 - 10 Maio 2016
Empoderamento Económico da Mulher, Género e Globalização8 Marsu 2016
Hamutuk, Hametin no Haburas Igualdade Jéneru iha Timor-LesteLoron Boot SEPI
Loron Internasionál Feto RuráL
Loron Nasionál Feto Timor-Leste
Kampaña Loron 16 Ativismu Kontra Violénsia Hasoru Feto
Loron Internasionál Feto
Diskursu
04 Oktober 2017
Deskursu Board Rede Feto iha Serimonia HandOver Servisu SEM ba SEIGIS
15 November 2013
Diskursu Sekretariu Estadu ba Assuntu ASEAN Sr. Roberto Sarmento de Oliveira Soares Iha Loron Nasional Feto
15 November 2013
Hateten Lae ba Violensia Domestika, Hamutuk ita Servisu ba Dezenvolvimentu Nasional
Arkivu
Statistika Vizitantes
![]() | : 92 |
![]() | : 712 |
![]() | : 142678 |
![]() | : 963961 |
![]() | : 6 |