» Notisias
Kinta, 20 September 2012
Workshop Violénsia Bazeia ba Jéneru ba Kadete Akademia Polisia
![](foto_nuticia/024.jpg)
Foin dadauk iha loron 20 fulan Setembru 2012 SEPI halo workshop kona-ba Violénsia Bazeia ba Jéneru ba kadete sira Akademia Polísia. Ida ne’e rezultadu husi enkontru entre SEPI ho Diretór Akademia Polísia iha tinan 2011, ne’ebé loloos SEPI nia ideia mak atu hatama matéria kona-ba violénsia bazeia ba jéneru iha kurríkulu Akademia Polisia. Maibé tanba materia ba kadete foun nakonu ona, SEPI no Akademia Polísia mós konkorda atu hatama materia ne’e iha workshop ketak ho tempu badak deit.
Ho nune’e maka Sr. Luis Candeias husi Akademia Polísia iha Cômoro, Díli, dezeña orariu ida hodi fo oportunidade atu SEPI bele hato’o materia violénsia bazeia ba jéneru iha ne’eba, hahú husi loron 10 to’o loron 18 fulan Setembru 2012.
Materia ne’ebé fó iha workshop ida ne’e mak jéneru baziku, violénsia bazeia ba jéneru, Lei Kontra Violénsia Doméstika, no investigasaun ba violénsia bazeia ba jéneru. Ne’e tanba polisia sira mak iha responsabilidade atu fó protesaun no seguransa ba vítima ne’ebé hetan violénsia bazeia ba jéneru, inklui violénsia doméstika. Sira mós iha knaar atu investiga kazu hirak ne’e hodi prosesu ba tribunál.
Partisipante ba workshop ne’e hamutuk ema nain 250, ne’ebé feto hamutuk nain 25 no mane 225. Sira ne’e husi Turma I, feto mak ema nain 4, no mane ema nain 42. Husi Turma II, feto hamutuk nain 4 no mane nain 42. Husi Turma III, feto hamutuk nain 4, no mane nain 42. Husi Turma IV, feto hamutuk nain 5, no mane nain 42. Husi Turma V, feto hamutuk nain 4, no mane nain 41. Husi Turma VI, feto mak nain 4, no mane hamutuk nain 41.
Fasilitador sira ba workshop ne’e mak Sra. Maria Filomena Babo Martins (Xefe Departamentu Formasaun SEPI), Carla Maria Valente (Asistente Formador, Departamentu Formasaun SEPI), Celeste Ramos Gonçalves (Tékniku profisionál, Departamentu Lejislasaun SEPI), no Sr. Mário Ximenes (Ofisial formasaun UNFPA).
Departamentu Media SEII | Author : Nug
![]() | : 90 |
![]() | : 709 |
![]() | : 142676 |
![]() | : 963958 |
![]() | : 5 |