» Notisias

Sesta, 12 Oktober 2018

Komemorasaun Loron Internasionál Feto Rurál, ho topiku Hakbi’it Ekonómia Feto Rurál iha Prosesu Dezenvolvimentu Ekonómiku iha Timor-Leste

Sekretaria Estadu ba Igualdade no Inkluzaun (SEII), komemora Loron Internasionál Feto Rurál, ho topiku Hakbi’it Ekonómia Feto Rurál iha Prosesu Dezenvolvimentu Ekonómiku iha Timor-Leste. Mundu tomak rekoñese no valoriza feto rurál sira nia servisu, sira nia dedikasaun no sira nia kna’ar hodi dezenvolve ekonómia iha nasaun ida-idak. Maske sira nia kontribuisaun makas tebes ba dezenvolvimentu nasaun ida nian, maibé sira sei hasoru difikuldade oin-oin liga ho asesu ba rekursu no oportunidade hanesan asesu ba rai, ahi, bee, Estrada, Saúde, Edukasaun, Empregu no seluk-seluk tan. Tamba ne’e, Organizasaun ba Nasaun Unidos (ONU) deside loron 15 Outobru hodi komemora Loron Internasionál ba Feto Rurál.

Iha Timor-Leste, feto kompostu husi metáde populasaun no maioria hela iha área rurál. Lokalizasaun iha área rurál sai hanesan dezafiu ba feto sira liu-liu liga ho asesu ba bee-mos, Eletrisidade, Liron, Informasaun, Komuniksaun, Saude, Edukasaun no sst. Hare ba limitasaun hirak ne’ebé feto rurál sira hasoru, governu hala’o kompromisu Deklarasaun Maubisse iha tinan 2015, ne’ebé bolu responsabilidade liña ministériu nian atu hamutuk halo esforsu hodi hakbi’it feto rurál no halakon diskriminasaun hasoru sira hodi sira bele partisipa iha dezenvolvimentu nasaun nian.

Iha komemorasaun loron Internasionál ba Feto Rurál, SEII hamutuk ho entidade governu halo lansamentu ba Deklarasaun Maubisse ba faze darua, atu nafatin hametin no haforsa kompromisu ba implementasaun Deklarasaun Maubisse ne’ebé mak antes ne’e halao ona iha loron 15 Outubru tinan 2015, iha Postu Administrativu Maubisse Munisípiu Ainaro. Administrador Munisípiu Aleu, liu husi reprezentante Administrador Postu Administrativu Laulara hateten, Agradese ba Governu konstituisional daualu liu husi Sekretaria Estadu ba Igualdade no Inkluzaun, tanba Munisípiu Aileu espesiál ba Postu Administrativu Laulara bele hetan oportunidade bo’ot hodi selebra Loron Internasonál ba Feto Rural iha tinan ida ne’e.

Sekretaria Estadu ba Igualdade no Inkluzaun Sra. Maria josé da Fonseca Monteiro de Jesus liu husi diskursu hateten, tinan 2018 governu Timor-Leste reafirma ninia komprimisiu atu implementa deklarasaun Maubisse ba darua, ne’ebé foka ba hakbi’it Ekonómia Feto Rurál, inklui Feto foin Sae no ema ho difisiennsia. Governo Konstituisional ba daualu, tau importansia ba dezenvolvimentu rurál hanesan prioriadade programa governo nian ba tinan lima oin mai.

Selebrasaun ba Loron Internasionál Feto Rurál iha tinan ida ne’e selebra iha iha Suku Fatisi, Postu Administaviu Laulara Munisípiu Aileu iha loron 12 fualan Outubru priexe mós ho ativdidade Kulinaria, no Feira ba Produtu lokal.