» Notisias
Kuarta, 11 Maret 2020
Emerenciana Pinto Sai Manan Na’in ba Prémiu Kobertura Notisias Sensivel ba Jéneru Tinan 2020
Dili, 9 Marsu 2020—Jornalista STL, Emerenciana Pinto sai manan na’in ba prémiu kobertura sensivel ba jéneru tinan 2020.
Prémiu ne’e intrega direita hosi Prezidente AJTL, Zevonia Vieira no akompaña hosi Diretór-Jerál SEII, Armando da Costa no reprezentante hosi Vice-Embaixadór Austrália ba Timor-Leste, Philippa Venning liuhosi diskusaun kafé dader iha komemorasaun Loron Internasionál Feto iha Timor-Plaza.
Prémiu ne’e intrega ba Emerenciana bazeia ba avaliasaun no ánaliza ne’ebé ekipa hosi SEII, Programa Nabilan, Konsellu Imprensa, SECOMS no JSMP halo ba mídia imprimi 3 hanesan STL, Timor Post no jornál Independente hafoin formasaun sensivel ba jéneru ne’ebé hala’o iha tinan 2018 ba xefe-redasaun hosi mídia sira iha Timor-Leste. Emerenciana mós sai manan na’in tanba nia prenxe duni kriteria no foti notisias ida ne’ebé maka haree liu ba igualdade jéneru no oinsá atu promove partisipasaun feto nian iha dezenvolvimentu iha setores hotu-hotu.
Iha ninia intervensaun wainhira simu prémiu ne’e, Emerenciana hatete katak nia la espera atu bele simu prémiu ne’e tanba durante ne’e nia hakerek notisia la hanoin atu hetan prémiu, maibé nia hakerek atu promove duni feto oinsá atu kapasita feto ba oin.
“Dala barak haree hosi família, ezemplu iha ha’u nia família rasik, ha’u nia alin mane baku nia ferik-oan, entaun ha’u ko’alia ne’e violénsia doméstika, depois sira hatán ne’e bikan ho kanuru mak tarutu, entaun momentu ne’ebá, ha’u buka dalan legal ida, ha’u ba intrevista administradór, ALFELA no Rede Feto, ha’u hakerek langsung tau judul katak, Baku Ferik-oan la’ós bikan kanuru mak tarutu maibé ne’e violénsia doméstika, ha’u hakerek no publika.
Nune’e mós ha’u buka nafatin informasaun, katak ema sempre diskrimina feto, katak feto iha dapur de’it, ha’u publika tan tau tópiku, dapur la’ós fatin permanente ba feto de’it, maibé feto ho mane mós partisipa iha laran”, esplika manan na’in Emerenciana.
Prémiu ne’e hanesan faze dahuluk ne’ebé hala’o ba mídia imprimi 3 ho objetivu atu motiva jornalista mane no feto sira atu kontinua promove igualdade jéneru liuhosi sira nia kobertura no publikasaun ne’ebé sensivel ba jéneru no espera katak ida ne’e la halo ba mídia imprimi de’it maibé sei halo mós ba mídia hotu ne’ebé eziste iha Timor-Leste iha futuru.
Ikusliu, Emerenciana Pinto hato’o agradese ba Embaixada Austrália, SEII, Rede Feto, CAUCUS, Fokupers no parseiru sira hotu ne’ebé tau-matan ona ba feto hodi kontinua hakbiit feto maluk sira.
Departamentu Media SEII | Author : Média SEII
![]() | : 117 |
![]() | : 801 |
![]() | : 142703 |
![]() | : 964050 |
![]() | : 5 |