» Notisias

Tersa, 09 April 2013

Primeira Dama Sra. Isabel Ferreira: Feto sira iha vantajen

Feto sira iha knaar ida ne’ebé importante ba dezenvolvimentu iha ita-nia rain no ekonomia, maibé iha mós valór hirak ne’ebé iha tendénsia atu hamosu diskriminasaun no fó benefisiu ba mane sira no mós halo feto sira ladún valoriza sira-nia an rasik. Liafuan hirak ne’e hato’o husi Sra. Isabel Ferreira, fen husi S.E. Sr. Taur Matan Ruak, Presidente Repúblika Demokrátika Timor-Leste iha okaziaun selebrasaun Loron Internasionál ba Feto, iha loron 8 Marsu 2013 ne’ebé organiza husi Provedoria dos Direitos Humanos e Justiça iha salaun Comissão Nacional das Eleições (CNE) iha Caicoli, Dili.

Tuir Sra. Isabel, feto sira iha atitude ne’ebé haluha valór loloos no nesesidade atu promove potensialidade hirak ne’ebé feto ida-idak iha. “Tuir ha’u-nia hanoin, feto sira iha vantajen tolu ne’ebé ita bele halo komparasaun: fleksível; multi-funsionál (iha funsaun oi-oin); no iha dedikasaun.”

Feto ne’e fleksível, tanba hahu hosi idade ne’ebé sei nurak, sira hetan knaar atu hala’o knaar oi-oin ne’ebé dala ruma kompleksu no ejize responsabilidade. Feto sira aprende ajuda inan-aman hodi kontribui ba nesesidade uma-laran hanesan hamoos, tein no fase, no knaar barak selseluk tan.

Feto sira aprende jere tempu, espasu no rekursu sira ne’ebé ejiste. Feto sira aprende importánsia hosi eduka oan sira ka sira-nia maun-alin sira, no valór edukasaun ba sira ne’ebé ki’ikoan liu, nu’udar baze ba mane sira atu sai ema ne’ebé iha responsabilidade iha loron oin main.

“Bainhira feto sira tama ba iha merkadu traballu, feto sira akumula koñesimentu firak ne’e hotu no konsege adapta sira-nia an iha fatin oioin, ambiente oi-oin no iha kolega serbisu sira-nia le’et,” katak Sra. Isabel Ferreira.

Feto iha funsaun oioin ka multi-funsionál tanba durante sira-nia moris tomak, sira iha nafatin knaar atu kumpre misaun barak liután iha tempu ne’ebé hanesan. “Ha’u rasik bele sau testemuña kona-ba ida ne’e iha ha’u-nia moris loroloron nian: ha’u inan ba oain na’in tolu, feen ne’ebé dedika an atu apoia ha’u-nia laen, jere/tau matan ba uma-laran, akompaña membru família uma-laran ida-idak,” katak Sra. Isabel Ferreira. “Halo buat hirak ne’e hotu hamutuk ho knaar selseluk tan: ha’u konsege estuda no finaliza kursu Direitu, ha’u ativista Direitus Humanus, Jurista, Governante, ohin ha’u Komisária no Primeira-Dama ba Nasaun ida ne’e nian.”

Feto mós iha dedikasaun, tanba iha mundu ida ne’ebé mane sira mak domina vantajen iha asesu ba edukasaun, ba servisu Estadu nian no iha oportunidade oioin, só feto sira ne’ebé iha vontade di’ak maka’as mak konsege hetan susesu. Sra. Isabel Ferreira fó korejen ba feto hothotu atu iha vontade di’ak maka’as no dedikasaun barak liután.

Selebrasaun Loron Internasionál ba Feto ne’e hetan partisipasaun husi Membru Governu, Vise Ministra Saúde no Vise Ministra Edukasaun, Membru Parlamentu, Provedor Direitos Humanos e Justiça no Adjunto Provedor Direitos Humanos e Justiça, Embaixador Indonesia ba Timor-Leste, organizasaun sosiedade sivil no feto vítima husi direitus umanus.


Departamentu Media SEII | Author : Nug
Loron Boot SEPI
Loron Internasionál Feto RuráL
Loron Nasionál Feto Timor-Leste
Kampaña Loron 16 Ativismu Kontra Violénsia Hasoru Feto
Loron Internasionál Feto
Arkivu
Statistika Vizitantes

00667265

Ohin loron : 149
Hits ohin loron : 1498
Total : 123390
Hits : 667265
Online : 4