» Notisias
Sabadu, 28 April 2012
Vizita Estudu kona-ba Orsamentu Sensivel ba Jéneru iha India
Sekretaria Estadu ba Promosaun Igualdade S.E. Sra. Idelta Maria Rodrigues lidera delegasaun Timor-Leste ne’ebé kompostu husi ema nain 20 ba India hahú husi loron 21 too loron 28 fulan Abril 2012 halao vizita estudu kona-ba Orsamentu Sensivel ba Jéneru. Atividade ne’e parte ida husi programa ”Igualdade Jéneru no Direitu Feto iha Timor-Leste” kolaborasaun entre SEPI ho UN Women.
Membru husi delegasaun ne’e maka Membru Parlamentu Nasionál, funsionáriu husi SEPI, Sekretaria Estadu ba Formasaun Profisional no Empregu (SEFOPE), Ministériu Finansas, Ministériu Agrikultura no Peskas, Ministériu Solidaridade Sosiál, reprezentante husi Provedoria Direitus Humanus no Justisa, Universidade Nasionál Timor Lorosa’e, Presidente Grupu Traballu Jéneru/Sekretariu Adiministrador Distritu Dili no Lospalos, no reprezentante husi ONG. UN Women mós haruka sira-nia funsionáriu nain rua ba partisipa iha atividade ne’e.
“Objetivu prinsipál husi vizita estudu ne’e mak atu fó oportunidade ba partisipante sira atu halibur informasaun diretamente relasiona ho implementasaun Orsamentu Sensivel ba Jéneru; esensialmente, partisipante sira bele hetan oportunidade atu estuda husi prátika diak iha India,” katak Sra. Idelta Maria Rodrigues.
Nuudar atividade ida husi programa ne’e, Sekretaria Estadu sei hala’o vizita kortesia ba Ministéria Dezenvolvimentu Feto no Labarik India Sra. Krishna Tirath. Atividade sira seluk maka reuniaun ho Reprezentante Altu Nível Governu India, Diretora Programa Rejionál UN Women Sr. Anne Stenhammer no organizasaun naun-governamental (ONG) nasionál hirak ne’ebé importante iha New Delhi.
Hala’o mós vizita ba sidade Jaipur, iha estadu Rajasthan, hodi haree oinsa elabora no implementa Orsamentu Sensivel ba Jéneru no oinsa ninia impaktu iha nível komunidade.
Hotu tiha vizita estudu ne’e, partisipante sira bele hetan koñesimentu klean liután kona-ba asuntu sira ne’ebé bele fó impaktu ba feto, parte interezada sira iha nível oi-oin, dalan oi-oin ba implementa Orsamentu Sensivel ba Jéneru. Ikus liu, sira sei lori mai abilidade no koñesimentu ne’ebé sira hetan husi India no sei hato’o ba ema husi instituisaun relevante sira iha Timor-Leste.
Departamentu Media SEII | Author : Nug
![]() | : 66 |
![]() | : 662 |
![]() | : 142652 |
![]() | : 963911 |
![]() | : 7 |