» Notisias
Tersa, 28 Mei 2013
Validasaun ba Relatóriu CEDAW Darua no Datolu
![](foto_nuticia/CEDAWrsp.jpg)
Preparaun Relatóriu Periódiku CEDAW darua no datolu tama ona faze finalizasaun. Iha loron 25 Abril 2013 SEPI organiza workshop validazaun ba esbozu Relatóriu Periódiku ne’ebé prepara ona. Tuir Sra. Ana Paula Maia, membru husi Ekipa Elaborasaun Relatóriu CEDAW, iha workshop ne’e SEPI aprezenta esbozu finál Relatóriu Periódiku CEDAW husi Governu Timor-Leste. “Objetivu husi workshop ne’e mak atu hetan koreksaun, sujestaun no aprovasaun ba informasaun ne’ebé elabora ona iha esbozu segundu hodi kompleta Relatóriu CEDAW ne’ebé sei submete ba Konsellu Ministru iha fulan Maiu nia laran,” esplika Sra. Ana Paula Maia.
Workshop validasaun ne’e nu’udar prosesu konsultasaun ba dala ikus ba esbozu Relatóriu CEDAW. Ho koordenasaun diak entre Ekipa Elaborasaun Relatóriu CEDAW ho Diresaun Nasionál Administrasaun no Finansas, Diresaun Nasionál Polítika Dezenvolvimentu Jéneru, Departamentu Media SEPI no mós UN Women, workshop ne’e halao tuir duni planu.
Workshop hala’o iha Hotel Timor, husi tuku 9.00 to’o tuku 17.50. Alein de apresentasaun husi Ekipa Elaborasaun Relatóriu CEDAW, marka mós prezensa iha ne’e orador xave ida, Sra. Mary Shanthi Dairiam, perita ba CEDAW ida ne’ebe uluk tu’ur hanesan membru Komité CEDAW iha Nova Yorke no fundadora no presidente ba International Women’s Rights Watch – Asia Pasifiku nian. Sra. Shanthi Dairiam mai atu fahe nia esperiénsia kona-ba prosesu tomak CEDAW nian, importansia husi halo relatóriu no kna’ar husi membru Komité CEDAW sira nian iha ONU no mós iha sira ida-idak nia estadu.
Workshop loke ho lian dahuluk husi Diretór Jerál Interinu SEPI, Sr. Armando da Costa hafoin introdusaun badak husi Sra. Janet Wong husi UN Women kona-ba suporta husi UN Women ba prosesu hakerek Relatóriu CEDAW Timor-Leste nian, inklui haruka perita hanesan Sra. Shanthi Dairiam mai Timor-Leste hodi hare preparasaun Relatóriu CEDAW ba darua no datolu nian.
Sra. Shanthi Dairiam iha nia palestra hateten katak objetivu bo’ot husi Governu Timor-Leste iha hakerek relatóriu ida ne’e ba Komité CEDAW iha ONU hodi hatudu katak Governu iha kompromisu bo’ot ba proteje no implementa direitus umanus feto sira nian no Governu hatudu katak nia iha kompromisu atu implementa Konvensaun CEDAW. Partisipantes ba workshop ne’e hatudu sira-nia antisiasmu hodi husu perguntas barak ba Sra. Shanthi Dairiam kona-ba prosesu relatóriu, implementasaun Konvensaun CEDAW no kna’ar husi perita sira ne’ebe tu’ur iha Komité CEDAW.
Sekretária Estadu ba Promosaun Igualdade Sra. Idelta Maria Rodrigues hato’o nia mensajen ba partisipantes iha sesaun lorokraik tanba dader tenke ba reuniaun Konsellu Ministru. “Iha okaziaun ida ne’e hau hakarak espresa ami nia laran haksolok tanba SEPI hetan honra bo’ot ida atu bele hasoru malu ho Sra. Shanthi Dairiam, perita ida ne’ebe fahe ona nia esperiénsia no matenek balu kona ba CEDAW no nia prosesu tomak,” hateten Sra. Idelta Maria Rodrigues.
Sekretaria Estadu mós hateten katak workshop validasaun ida ne’e nu’udar parte importante ida husi prosesu elabora Relatóriu CEDAW Timor-Leste nian. “Tan ne’e, partisipantes hotu ne’ebe reprezenta sira nia Ministériu, Sekretariu Estadu, PDHJ, no reprezenta sira nia orgnizasaun, ONG sira, iha kna’ar no responsabilidade bo’ot atu supporta prosesu tomak,” tenik Sekretaria Estadu.
Totál partisipante ne’ebe partisipa iha workshop validasaun esbozu final Relatóriu Periódiku CEDAW hamutuk ema na’in 61, kompostu husi reprezentante husi Ministéri relevante hanesan Ministériu Justisa, Ministériu Saúde, Ministériu Edukasaun, Ministériu Agrikultura no Peskas, Ministériu Solidariedade Sosiál, Ministériu Negosius Estranjeirus, Ministériu Finansas, no Sekretaria Estadu ba Polítika Formasaun Profisionál no Empregu (SEPFOPE), Polísia Nasionál Timor-Leste (PNTL), Provedoria dos Direitos Humanos e Justiça (PDHJ), Procuradoria Geral da República (PGR) Timor-Leste, organizasaun naun-governamental nasionál no internasionál balun, média, no mós reprezentante husi ajénsia ONU hanesan UN Women, UNFPA no ILO.
Fasilitador ba atividades workshop kompostu husi funsionáriu husi Diresaun Nasionál Polítika Dezenvolvimentu Jéneru, Diresaun Nasionál Administrasaun no Finansas, Ekipa Elaborasaun Relatóriu CEDAW rasik (Ana Paula Maia, Yann Franc de Friere) no Koordenador Programa CEDAW husi UN Women (Maria Agnes Bere).
Tuir kalendarizasaun ba submisaun, hafoin aprova tiha iha Konsellu Ministru, Relatóriu Periódiku CEDAW Timor-Leste Darua-Datolu sei haruka ba Komité CEDAW iha sidade Jenebra iha fulan Maiu 2013. Relatóriu CEDAW ida ne’e informa ba Komité CEDAW kona-ba progresu direitus umanus feto sira nian no igualdade jéneru iha Timor-Leste nu’udar kompromisu ba implementasaun tratadu internasionál CEDAW.
Departamentu Media SEII | Author : Nug
![]() | : 42 |
![]() | : 617 |
![]() | : 142628 |
![]() | : 963866 |
![]() | : 4 |