» Notisias
Tersa, 27 Agustus 2013
Pontu Fokál SEPI Na’in Rua ba Tuir Kapasitasaun iha Korea
![](foto_nuticia/treinkorea13.jpg)
Nu’udar atividade ida hodi aumenta ninia kapasidade institusionál, SEPI haruka ninia funsionáriu na’in rua ba tuir treinamentu iha Repúblika Korea iha loron 25 fulan Agustu to’o loron 11 fulan Setembru 2013. Treinamentu ho titulu “Programa Dezenvolvimentu Vokasionál ba Feto” ne’e organiza husi Ministériu Igualdade Jéneru no Família Repúblika Korea. Funsionáriu na’in rua mak partisipa iha treinamentu ida ne’e mak Noemia Magno (Pontu Fokál SEPI ba Distritu Dili) no Domingas Soares Nunes (Pontu Fokal SEPI ba Distritu Baucau).
Objetivu husi treinamentu ne’e mak atu promove koñesimentu di’ak liután no kompetensia ezekutivu ba ofisiál kona-ba polítika no epesialista sira kona-ba dezenvolvimentu vokasionál ba feto hodi hakbiit estadu sosiál-ekonómiku feto sira-nia; estabelese modelu nasionál ba programa dezenvolvimentu feto bazeia ba polítika vokasionál no estudu kazu Korea nian ne’ebé hetan susesu ona; no harii rede polítika ne’ebé kontinua ba bebeik no estabelese sistema padronizadu kona-ba haree nesesidade kada nasaun ba dezenvolvimentu vokasionál feto sira-nia.
Programa ne’e foka liu ba espalla Programa Dezenvolvimentu Vokasionál husi Korea ba nasaun sira seluk liu husi estuda kona-ba Programa Dezenvolvimentu Vokasionál no Politika kona-ba Feto no mós partilla ezemplu di’ak. Liu husi ida ne’e, partisipante sira bele hetan koñesimentu di’ak liután kona-ba oinsá aplika ba sira-nia nasaun ida-idak ideias ne’ebé sira hetan husi programa ne’e.
Ba programa ne’e, komisaun organizadora prepara modulu neen: 1) Polítika kona-ba Veto no Polítika Dezenvolvimentu Vokasionál iha Korea; 2) Metódolojia Dezenvolvimentu Vokasionál ba Feto & Estatéjia Implementasaun ba Polítika Jéneru; 3) Estudu kazu kona-ba utilizasaun Rekursu Feto iha Korea; 4) Estudu kazu kona-ba Polítika Dezenvolvimentu Vokasionál ne’ebé konsidera situasaun rejionál; 5) Vizita/Inspesaun Industriál; 6) Planeamentu Asaun.
Modulu ne’e balu hala’o iha salaun, balu hala’o iha servisu fatin duni, ne’ebé partisipante sira sei ba halo vizita. Vizita sei halao dala neen, hanesan ba Eskola Sekundária Informasaun no Teknolojia Feto; Politeknika Korea, Kampus Feto Anseong; Sentru Dezenvolvimentu Feto Gyeonggi; Sentru Dezenvolvimentu Feto Bukbu; Ministériu Igualdade Jéneru no Família; Sentru Extensaun no Teknolojia Agrikulturál Gochang; Merkadu Ai-han Lokal Jeonju; no Sentru Sirkulasaun Ekonomia Lokál Wanju.
Programa ne’e organiza tinan-tinan ba nasaun sira ne’ebé Governu Korea konsidera presiza. Ba tinan ida ne’e Governu Korea konvida partisipante husi nasaun sanulu (10), hanesan Bangladesh, Cambodia, Indonesia, Mongolia, Nepal, Sri Lanka, Timor-Leste, Ukraina, Uzbekistan, no Vietnam.
Departamentu Media SEII | Author : Nug
![]() | : 150 |
![]() | : 869 |
![]() | : 142736 |
![]() | : 964118 |
![]() | : 9 |