» Notisias

Tersa, 05 Juni 2012

Kooperasaun entre SEPI ho Universidade Gadjah Mada (UGM) Yogyakarta

Prioridade ida husi Sekretaria Estadu ba Promosaun Igualdade (SEPI) maka dezenvolve kapasidade institusional SEPI nian para bele servisu ho efikaz ba promove igualdade entre feto ho mane iha Timor-Leste.
Atu dezenvolve kapasidade ne’e SEPI hala´o kolaborasaun ho instituisaun sira seluk inklui iha rai liur hanesan Indonesia no mós Portugal. Iha loron 2-5 fulan Juñu tinan 2012, Sekretaria Estadu ba Promosaun Igualdade Sra. Idelta Maria Rodrigues hamutuk ho delegasaun hala’o vizita ba sidade Yogyakarta, Indonesia.

“Objetivu prinsipál husi vizita ne’e mak atu asina Karta Akordu (Letter of Agreement) enrre SEPI ho Universidade Gadjah Mada (UGM). Liu husi Karta Akordu ne’e instituisaun rua ne’e konkorda atu halo kooperasaun iha área hanesan: kapasitasaun ba rekursu umanu funsionáriu SEPI nian; dezenvolve área peskiza kona-ba jéneru; troka esperiénsia no matenek ne’ebé relevante ho asuntu promosaun igualdade jéneru,” katak Sekretaria Estadu ba Promosaun Igualdade Sra. Idelta Maria Rodrigues.

Serimonia asinatura ne’e hala’o iha salaun Rektorat UGM, iha Kampus Bulaksumur, Yogyakarta, iha loron 4 fulan Juñu 2012. Husi parte UGM, ida ne’ebé asina Karta Akordu ne’e mak hanesan Prof. Dr. Pratikno nuudar Retór UGM. Iha serimonia ne’e, husi parte UGM marka prezenza mós Vise Retor sira no mós Dekanu no Xefe Sentru Estudu sira. Husi parte SEPI, Sra. Idelta Maria Rodrigues nuudar Sekretaria Estadu ba Promosaun Igualdade mak asina Karta Akordu ne’e. Marka presenza mós Diretor Jerál SEPI Sr. Thomas da Silva, Diretór Nasionál Polítika Dezenvolvimentu Jéneru Sr. Armando da Costa, Inspetora no Auditoria Sra. Maria José Sanches, Xefe Departamentu Rekursu Umanu Sra. Maria Esperança Martins, Xefe Departamentu Peskiza Sr. Herminio Xavier, Asesor ba Gabinete Sekretaria Estado Sr. Tony Duarte, Sekretaria ba Sekretaria Estadu Sra. Joana Fabiola Laranjinha, Asesor Média Sr. Nugroho Katjasungkana, no Xefe Departemantu Rekursus Umanus Sekretaria Estadu ba Rekursu Naturais (SERN) Sra. Ana Lucinda Ribeiro.

Iha ninia diskursu, Sra. Idelta maria Rodrigues hato’o katak “SEPI hili UGM nuudar parseiru ba programa dezenvolvimentu kapasidade institusional tanba UGM iha kapasidade diak liu iha área peskiza no mós área sira seluk.” Liu husi kolaborasaun ne’e, SEPI haruka ninia funsionáriu atu eskola iha UGM iha nivel mestradu no kursu iha área peskiza jéneru. Instituisaun rua ne’e mós sei organiza konferensia no kolokiu kona-ba asuntu relevante ho jéneru iha Yogyakarta no iha Dili. SEPI mós sei hala’o peskiza kona-ba asuntu oi-oin relevante ho promosaun igualdade jéneru ho apoiu husi peskizador sira husi Universidade Gadjah Mada (UGM).

Sra. Idelta Maria Rodrigues mós hato’o katak iha Timor-Leste, SEPI foin dadauk suporta Universidade Nasional Timor Lorosa’e hodi harii Sentru Estudu Jéneru. “Ami desezu katak ami bele fasilita UGM no UNTL atu bele aprende ba malu no troka esperiénsia ne’ebé relevante ho asuntu promosaun igualdade jéneru no hakbiit feto,” katak Sekretaria Estadu.

Retor UGM Prof. Dr. Pratikno hatete katak UGM prontu atu kolabora ho SEPI hodi promove feto nia papel hodi aselera dezenvolvimentu nasionál Timor-Leste nian. Iha ninia diskursu Retor UGM ne’e dehan katak, “UGM sente orgullu tanba bele halo kooperasaun ho Governu Timor-Leste iha área hakbiit papel feto iha dezenvolvimentu nasionál Timor-Leste nian. Iha UGM iha fakuldade hamutuk 18 no sentru estudu hamutuk ualu (8) ne’ebé prontu atu apoiu aselerasaun dezenvolvimentu iha Timor-Leste.” Prof. Dr. Pratikno salienta tan katak iha UGM mós iha Pusat Studi Wanita (Sentru Estudu Feto) ne’ebé iha ona esperiénsia barak kona-ba edukasaun, peskiza no treinamentu ba hakbiit feto nia papel iha dezenvolvimentu.

Iha okaziaun vizita ba Jogjakarta ne’e, aleim de asina Karta Akordu ho UGM, Sekretaria Estadu ba Promosaun Igualdade mós hala’o reuniaun ho estudante S1 no S2 ne’ebe hetan bolso de estudo husi Governo Timor-Leste ne’ebé estuda iha Yogyakarta. Reuniaun ne’e hala’o iha salaun Programa Mestradu Administrasaun Públika UGM iha loron 3 fulan Juñu 2012 no hetan partisipasaun husi estudante sira kuaze ualu nulu.