» Estrutura SEII

Estrutura SEII nian dezenvolve iha tinan 2008 bazeia ba Dekretu Lei No. 16/2008 loron 4 fulan Jullu 2008 ne’ebé defini katak iha estrutura SEII nia laran iha Diretór Jerál ida no Diresaun Nasionál rua: Diresaun Nasionál Administrasaun & Finansas (DNAF) no Diresaun Nasionál Polítika Dezenvolvimentu Jéneru (DNPDJ). Ho alterasaun Dekretu Lei ne’e iha loron 8 fulan Janeiru 2012, estrutura SEII aumenta ho orgaun rua: (1) Inspetor no Auditor no (2) Konsellu Konsultivu.

Diretór Jerál nia responsabilidade mak asegura no fó orientasaun jéral ba servisu hotu Sekretaria Estadu ba Igualdade no Inkluzaun ne’ebé orientadu ba Promosaun Igualdade Jéneru. Diretór Jerál nia kna’ar maka halo supervisau ba Diresaun Nasionál rua. Pozisaun Diretór Jerál SEII agora okupa husi Sr. Armando da Costa.

Diresaun Nasionál Administrasaun & Finansas

Diresaun ne’e nia kna’ar atu asegura apoiu tékniku no administrativu ba Sekretaria Estadu ba Igualdade no Inkluzaun, Diretór Jerál, no ba servisu sira seluk Sekretaria Estadu liu-liu ba iha área administrasaun jerál, rekursu umanu, dokumentasaun no arkivu, finansas, no mós jestaun patrimóniu. Iha Diresaun ne’e nia okos iha departamentu lima: Departamentu Administrasaun & Lojístika, Departamentu Finansas, Departamentu Rekursu Umanu, Departamentu Aprovisionamentu no Departamentu Informasaun no Teknolójia. Diretora Nasionál Administrasaun Finansas mak Sra. Maria José Sanches (2009-2011) ne’ebé iha tinan 2012 troka ho Sra. Benigna Amaral (tanba Sra. Maria José Sanches hetan nomeasaun kaer funsaun nu’udar Inspetora & Auditora).

Diresaun Nasionál Polítika Dezenvolvimentu Jéneru

Diresaun ne’e nia kna’ar atu asegura apoiu tékniku ba Sekretaria Estadu ba Igualdade no Inkluzaun liu-liu ba área análiza ba jéneru no dezenvolvimentu polítika no lejislasaun, monitorizasaun kona-ba implementasaun Abordajen Integradu Jéneru, no promosaun ba edukasaun kona-ba asuntu Igualdade Jéneru. Diresaun ne’e kompostu husi departamentu hitu: Departamentu Kapasitasaun Ekonómia Feto; Departamentu Abordajen Integradu Jéneru; Departamentu Formasaun; Departamentu Prevensaun Violénsia ba Jéneru; Departamentu Peskiza no Monitorizasaun; Departamentu Promosaun no Partisipasaun Polítika no Departamentu Media no Komunikasaun. Diretér Nasionál Polítika Dezenvolvimentu Jéneru mak Sr. Henrique da Silva maibe’e tanba Diretor ne’e hetan oportunidade ba bolsa estudu nune’e iha 31 Jullu entrega fali ba Sra Maria Filomena Babo Martins mak asume fali kna’ar hanesan Diretora .

Inspetora & Auditora

Diresaun Inspetor & Auditor nia responsabilidade mak kona-ba promosaun no avaliasaun étika no prosedimentu internál no realizasaun auditoria iha servisu integradu SEII. Diresaun ne’e foin harii iha tinan 2012. Diresaun ne’e nia kna’ar maka halo avaliasaun ba atividade jestaun administrativa, finanseira no patrimoniu servisu; identifika no investiga evidensia kona-ba infrasaun disiplina; hala’o inspesaun, investigasaun, analiza no auditoria; hala’o kna’ar sira seluk tuir lei no kna’ar sira seluk ne’ebé Sekretária Estadu delega ba. Posizaun Inspetora & Auditora foin kria iha 2012 ne’ebé Sra. Maria José Sanches mak kaer funsaun ne’e.

Konsellu Konsultivu

Iha SEPI nia laran iha mós Konsellu Konsultivu nuudar orgaun konsultasaun no koordenasaun ho kna’ar hala’o balanzu periódiku ba atividade SEII. Konsellu Konsultivu hala’o reuniaun tinan ida dala rua no bele mós hala’o reuniaun extraordinaria sei karik Sekretária Estadu determina. Konsellu Konsultivu ne’e sei kompostu husi Sekretária Estadu, Diretór Jerál, no Diretór Nasional sira. Sekretária Estadu bele konvida entidade sira seluk, instituisaun ka ema iha SEII nia laran ka husi liur, ne’ebé konsidera presiza