» Notisias

Sesta, 12 September 2014

Ambassador Thailandia despede Sekretaria Estadu ba Promosaun Igualdade

Ambassador Thailandia ba Timor-Leste Sr. Tawatchai Koopirom iha loron Sexta-Feira, 12 Setembru 2014 mai vizita Sekretaria Estadu ba Promosaun Igualdade (SEPI) hodi dispedida. Sr. Tawatchai Koopirom nia kargu atu hotu iha fulan ida ne’e nia laran.

“Ami apresia tebetebes kooperasaun di’ak entre Governu Timor-Leste ho Governu Thailandia. Hau hakarak mai hasoru Sekretária Estadu ba Promosaun Igualdade Sra. Idelta Maria Rodrigues tanba SEPI servisu barak tebetebes no di’ak tebetebes. Durante hau nia mandatu SEPI mós hala’o relasaun di’ak ho Thailandia,” katak Sr. Tawatchai Koopirom.

Iha tinan 2013, Vise Ministra Sosial Thailandia mai vizita Timor-Leste hodi partisipa iha Selebrasaun Loron Nasionál Feto 3 Novembru ba dala 36 no mós diskute kona-ba kooperasaun entre Governu Thailandia no Timor-Leste iha área promosaun igualdade. Iha Janeiru 2014 Prinsesa Thailandia Maha Chakri Sirindorn vizita Timor-Leste hodi lansa programa “The Zero Hunger Challenge” (Dezafiu Hamlaha Zero) ho objetivu asegura feto, mane no labarik sira goza direitu ba hahan adekuada no asegura sistema hahan ne’ebé sustentavel.

Sr. Ambassador Thailandia hatete katak nia sente laran triste atu husik Timor-Leste tanba durante ninia mandatu tinan rua ho balu ema Timor-Leste hotu-hotu simu nia ho laran diak. Iha vizita ne’e, Sr. Koopirom oferese hatais ofisiál no hatais uma nian nu’udar rekordasaun ba Sekretária Estadu ba Promosaun Igualdade Sra. Idelta Maria Rodrigues. “Ida ne’e mós hanesan ezemplu ida, atu inspira feto Timor-Leste bele produs tais ho ninia modelu rasik ne’ebé prontu atu hatais kedas,” katak Ambassador Thailandia.

Iha ninia parte, Sekretária Estadu ba Promosaun Igualdade Sra. Idelta Maria Rodrigues hato’o obrigadu ba Sr. Koopirom nia atensaun ba Timor-Leste, liu-liu ba ninia apoiu ba SEPI. Sra. Idelta mós hato’o rekordasaun miniature uma lisan Timor-Leste nian husi Distritu Lautém. “Ida ne’e simples, maibé sai nu’udar simbolu ba amizade entre Timor-Leste no Thailandia,” tenik Sekretária Estadu ba Promosaun Igualdade.


Departamentu Media SEII | Author : Nug
Loron Boot SEPI
Loron Internasionál Feto RuráL
Loron Nasionál Feto Timor-Leste
Kampaña Loron 16 Ativismu Kontra Violénsia Hasoru Feto
Loron Internasionál Feto
Arkivu
Statistika Vizitantes

00665572

Ohin loron : 88
Hits ohin loron : 2239
Total : 123224
Hits : 665572
Online : 5