» Notisias

Tersa, 28 Oktober 2014

Selebrasaun Loron Nasionál Feto 3 Novembru 2014 sei hala’o iha Manatuto

Sekretaria Estadu ba Promosaun Igualdade (SEPI) sei selebra Loron Nasionál Feto 3 Novembru ba dala 37 tinan 2014. Selebrasaun ne’e sei hala’o iha loron Kinta-Feira no Sesta-Feira, 6-7 fulan Novembru 2014 iha Administrasaun Distritu Manatuto. Tema husi selebrasaun ne’e mak ‘Sira-nia Luta mak Ita-nia Liberdade, Ita-nia Liberdade mak Ita-nia Responsabilidade hodi Promove Igualdade Jéneru’.

Tuir Sekretária Estadu ba Promosaun Igualdade Sra. Idelta Maria Rodrigues, tema ne’e hili nu’udar homenajen ba feto sira ne’ebé luta ba libertasaun nasionál no emansipasauan feto Timor-Leste. “Heroina sira mak fó ona inspirasaun ba jerasaun foun liu-liu feto sira hodi kontinua sira-nia luta ba igualdade entre feto no mane no mós ba liberta povo husi kiak, moras, no obskurantismu,” tenik Sra. Idelta Maria Rodrigues.

Selebrasaun ne’e sei hetan partisipasaun husi Autoridade Nivél Nasionál, hanesan S.E. Presidente Repúblika Sr. Taur Matan Ruak, S.E. Primeiru-Ministru Sr. Kay Rala Xanana Gusmão, Membru Parlamentu no Membru Governu sira no mós Autoridade Nivél Lokál mak hanesan Administradór Distritu, Grupu Traballu Jéneru Distritál husi ditritu 13, Administrador Subdistritu sira, no Xefe Suku feto sira hotu husi Timor-Leste tomak.

Ajenda Selebrasaun Loron Nasionál Feto 2014 hahú ho Kari Aifunan iha Jardim de Herois da Pátria (Metinaro) iha loron 6 fulan Novembru tuku 09.00 dader. Loron tuir mai, 7 Novembru, maka halo misa iha Igreja Manatuto tuku 08.00 dader. Depois tama iha serimónia prinsipál iha Kampu Administrasaun Distritu Manatutu ne’ebé komesa iha tuku 04.00 lokraik ho kanta Hino Nasionál, tuir fali diskursu husi S.E. Sekretária Estadu ba Promosaun Igualidade Sra. Idelta Maria Rodrigues, S.E Primeiru Ministru no S.E Presidente Repúblika. Hotu tiha diskursu sira, sei kanta múzika “Marsa Feto Timor”, dansa tradisionál husi grupu St. António, fahe prémiu Apresiasaun Jéneru, kanta “Feto Bele”, no lansamentu livru ne’ebé SEPI publika: Avaliasaun Jéneru Nasionál ba Daruak, Rezultadu Peskiza husi Centro de Estudo de Gênero, Relatóriu CEDAW ba Daruak no Datoluk, Relatóriu Implamentasaun PAN VBJ ba Daruak, no Relatóriu Daruak kona-ba Mekanizmu Grupu Traballu Jéneru no Esforsu Sira ba Abordajen Integrada Jéneru iha Timor-Leste. SEPI mós sei lansa filmajen kona-ba Kongresu Feto Distritál no Dialógu SEPI iha distritu 13 Timor-Leste tomak. Ajenda ikus liu mak konsertu múzika oferese husi artista Timor-oan sira, hanesan: Ofelia, Cidália, banda múzika feto Dejukdil, 5 de Oriente, no seluk-seluk tan.

Selebrasaun Loron Nasionál Feto ne’e bazeia ba istória Resisténsia nian wainhira Heroina Maria Tapó mate iha 3 Novembru 1975 wainhira nia kontra hasoru invasór militar Indonesia iha área fronteira, Tapó, Bobonaro nian. Hodi ida ne’e sasin sira haruka kedas karta ba Comité Central FRETILIN deklara: “Ami feto Tapó sei la rende, ami sei la rende nafatin, ami sei funu nafatin, ami sei funu to’o ami nia ran turuk ikus liu nian”. Hafoin simu tiha karta ne’e, Primeiru-Ministru Repúblika Demokrátika Timor-Leste Nicolau Lobato halo inisiativa iha ailaran iha tinan 1976 hodi deside loron 3 fulan Novembru sai nu’udar Loron Nasionál Feto. Ho nune’e iha tinan 1977 husi enkontru Comité Central FRETILIN dekreta rezolusaun ida ba loron 3 fulan Novembru sai nu’udar Loron Nasionál ba Feto Timor-Leste. Hahú husi ne’eba iha ailaran, tinan-tinan komemora Loron Nasionál Feto.

Liu tiha Restaurasaun Independénsia iha tinan 2002, iha Kongresu Nasionál Feto Daruak, iha tinan 2004, ne’ebé hetan partisipasaun husi organizasaun feto hotu-hotu iha Timor-Leste tomak, maluk feto sira ezije katak Timor-Leste tenke iha loron nasionál ba feto, atu fó valor no louvor ba feto sira tanba sira mós fó kontribuisaun maka’as ba Luta ba Libertasaun Nasionál 1975-1999. Ezijénsia ne’e sai hanesan plata-forma husi Kongresu Nasionál Feto Daruak no hato’o ba Parlamentu Nasionál hodi foti desizaun. Ikus mai Parlamentu Nasionál aseita no halo Lei Númeru 17/1/3/2005, ne’ebé deside loron 3 fulan Novembru sai nu’udar Loron Nasionál ba Feto Timor-Leste.

________

Presiza informasaun liután, bele kontaktu: Luisa da Silva (Xefe Departamentu Media no Komunikasaun) 77305770 no Odília Martins (Presidente Komisaun Organizadora Selebrasaun Loron Nasionál Feto 2014) 77326619