» Notisias

Tersa, 05 Juni 2012

Diretór Nasionál Polítika Dezenvolvimentu Jéneru tuir Treimanentu Lideransa iha Jakarta

Diretór Nasionál Polítika Dezenvolvimentu Jéneru Sr. Armando da Costa iha loron 5 to’o loron 8 fulan Juñu tinan 2012 ba iha Jakarta hodi tuir treinamentu kona-ba “Abilidade Lideransa ba Supervisor.” Treinamentu nee instituisaun CareerTack maka hala’o ho objetivu atu hasa’e liután kapasidade no abilidade iha área lideransa, oinsa atu lidera ekipa servisu, maneija programa, kominikasaun ho staf no oinsa atu resolve problema hirak ne’ebé mosu iha servisu fatin.

Partipantes ba treinamentu ne’e hamutuk ema nain hat husi Indonesia no ida husi Timor-Leste. Ho ninia treinadór mak Dra. Psi. Endang Kamuljan, MBA. Metodu ne’ebé uza durante treimanentu mak seminario husi treinadór, diskusaun no estudu kazu. “Tuir hau nia esperiénsia, treinamentu ne’e diak tebes, bele fo baze forte ba lideransa ida ho vizaun ne’ebé luan no abilidade profisionál hodi lidera ninia institusaun no fungsiunáriu,” dehan Sr. Armando da Costa.

Materia ne’ebé hetan durante treinamentu mak hanesan organizasaun, jestaun, funsaun jerente, planeamentu, dezenvolvimentu ekipa servisu ne’ebé efetivu, dezenvolve abilidade komunikasaun, lideransa ne’ebé efetivu, karakterístika lideransa, estimular dezempeñu individuál, rezolve problema, no tópiku ikus liu mak prosesu foti desijaun.

Sr. Armando da Costa rekomenda atu fungsiunáriu SEPI tuir treinamentu ne’e. “Liu-liu sira ne’ebé okupa kargu xefia, atu iha futuru bele atende treinamentu refere ou treinamentu hanesan iha fatin seluk hanesan Lideransa ho Perspetiva Jeneru iha UGM Yogyakarta,” tenik Sr. Armando da Costa.