» Notisias

Sesta, 31 Oktober 2014

Workshop Diosese Baucau kona-ba Moral no Justisa iha Moris Famíliar

Diretora Jerál SEPI Sra. Maria José Sanches iha loron Kinta-Feira, 30 Outubru 2014 partisipa nu’udar oradora ida iha workshop ne’ebé organiza husi Diosese Baucau. Workshop ho tema “Moral no Justisa iha Moris Famíliar” ne’e hala’o iha salaun Parokia Laga.

Workshop ne’e organiza atu fahe informasaun no atu aumenta koñesementu komunidade sira kona-ba moral no justisa iha moris família nia laran iha Timor-Leste. Igreja nia papel importante hodi habelar lia fuan maromak nian ba sarani sira ne’ebe mak servisu hamutuk ho Komisaun Paz no Justisa. Relasiona ho prekupasaun ba povo Timor-Leste nia moris ne’ebe mak família kaben nain sira hasoru hanesan fen laen soe malu, iha oportunidade ida ne’e Diosese Baucau liuhusi Komisaun Paz no Jostisa iha hanoin diak atu bele motiva no habelar informasaun ba sarani sira iha Subdistritu Laga.

Iha workshop ne’e, oradór na’in ha’at (4) mak hato’o sira-nia hanoin, hanesan Sra. Isabel Ferreira, Fen Kaben husi Presidente Repúblika Sr. Taur Matan Ruak, Komandante Operasionál PNTL, Adj. Mateus Fernandes, Padre José Tacain, no husi Sekretaria Estadu ba Promosaun Igualdade (SEPI), Diretora Jerál Sra. Maria José Sanches.

Workshop ida ne’e hetan partisipasaun husi Xefe Suku no Xefe Aldeia husi Subdistritu Baguia, Laga, Samalari, komunidade husi Subdistritu Laga, madres no estudante sira. Iha biban ne’e orador sira ko’alia no esplika kona-ba tópiku: Justisa no Família, Moral nu’udar Matandalan ba Moris Família, Igualdade Jéneru, no Seguransa, Dever no Direitu. Tópiku ha’at (4) ne’e importante atu ita hatene tanba dezenvolvimentu rai Timor-Leste ne’e atu sai diak presiza ema hotu-hotu nia kolaborasaun no kontribuisaun husi nia povo rasik ne’ebe mak iha moral no hatene nia dever no direitu hanesan sidadaun ne’ebe mak diak.

Padre Jose Tacain fo hanoin partisipantes sira katak tuir kalendáriu Igreja Katolika tinan 2014 hanesan Tinan ba Família. Iha workshop ne’e nu’udar Sra. Isabel Ferreira mós sente kontente ho família sira-nia partisipasaun hodi fahe hanoin no esperiénsia. Konstituisaun RDTL garante protesaun ba família hotu-hotu. “Família sira presiza moris hakmatek. Tanba família sai fatór importante atu eduka oan sira iha uma laran antes oan sira sai ba komunidade nia le’et. Inan aman sai modelu no exemplu diak ba oan sira buka transmiti moral no espiritual ba oan sira,” tenik Sra. Isabel Ferreira.

Diretora Jerál SEPI Sra. Maria José Sanches ne’ebé ko’alia kona-ba igualdade jéneru, hatete katak entre feto ho mane iha kna’ar no responsabilidade ne’ebe mak hanesan iha aspetu edukasaun, ekonomia, saúde, sosiál, kultura, no seluk-seluk tan. “SEPI nia kna’ar mak atu promove igualdade jéneru, para bele iha balansu iha aspeitu moris hotu-hotu,” katak Sra. Maria José Sanches.

Kona-ba seguransa, Komandante Adjunto Mateus Fernandes haree liu dever no direitu sidadaun ba seguransa. “Direitu no dever ne’e sei la ses malu. Sidadaun hotu-hotu tenke hatene sira-nia dever no direitu hodi prevene konflitu,” salienta Komandante Adjunto.