» Notisias

Segunda, 24 November 2014

Formasaun kona-ba Feto Rurál nia Papel iha Agrikultura

Dili 20/11/2014. Sekretaria Estadu ba Promosaun Igualdade (SEPI) hala’o formasaun ba Rede Hametin Agrikultura Sustentável Timor Lorosa’e (HASATIL) kona-ba sensibilizasaun jéneru. Formasaun ne’e organiza husi HASATIL rasik ba sira-nia pontu fokál husi distritu 13. Objetivu husi formasaun ne’e atu aumenta tan pontu fokál sira-nia koñesimentu kona-ba papel feto rurál sira iha agrikultura. Formasaun ne’e hato’o husi Xefe Departamentu Formasaun SEPI, Sra. Filomena Babo.

Enviromentu feto rurál nian sai hanesan buat ne’ebé define sira-nia moris loron-loron nian, tanba iha área rurál maioria laiha konseitu empregadu tanba kuaze ema hotu-hotu ba to’os. Nune’e sira-nia moris iha diferensia ne’ebé signifikativu teb-tebes ho feto sira ne’ebé hela iha área urbana.

“Feto urbana bele asesu ba fasilidade kompletu no presiza deit mak osan uitoan,” dehan Sra. Filomena Babo. “Maibé feto rurál sira hasoru difikuldade ne’ebé boot tebes. Hanesan exemplu, distansia atu lori sira-nia produtu atu ba fa’an iha merkadu dalabarak sai obstakulu bo’ot. Fatin atu fa’an sasan la apropriadu tanba dalaruma animal sira mak okupa fali no mós menus konsumidores tanba maioria ema iha área rurál bele produs,” tenik Sra. Filomena.

Sra. Filomena mos hatutan tan katak, “Problema kulturál no sosiál fo presaun liután ba feto rurál sira. Por exemplu, sosiedade ne’ebé partriarkal la fo oportunidade ba feto atu envolve iha atividade social. Entaun ida ne’e sei prevene feto sira atu bele koñese liután dezenvolvimentu liu-liu iha área agrikultura ne’ebé iha potensial atu hasae sira-nia kapasidada atu jere sira-nia produtu agrikultura.” Sra. Filomena enkoraja pontu fokál HASATIL sira atu bele envolve feto sira iha sira-nia atividade servisu no labele atu hanoin katak feto sira forsa laek tanba ne’e asaun marjinalizasaun hasoru feto sira.

Pontu fokál sira hatudu sira-nia antusiasmu maka’as hodi halo formasaun ne’e partisipativu tebes. Pontu fokál sira no partisipante sira seluk ne’ebé atende formasaun ne’e hamutuk ema na’in 20 ne’ebé kompostu husi feto na’in 2 no mane na’in 18.