» Notisias

Kuarta, 26 Februari 2015

Sekretária Estadu ba Apoiu no Promosaun Sosiu-Ekonómika Feto: “Funsionáriu sira tenke servisu ho responsabilidade hodi serve povo.”

Simu tiha pose nu’udar Sekretária Estadu ba Apoiu no Promosaun Sosiu-Ekonómika ba Feto (Secretaria de Estado para o Apoio e Promoção Socio-Económica da Mulher – SEM), Sra. Veneranda Lemos hala’o reuniaun ho funsionáriu no asesor sira hotu iha loron 24 Fevereiru 2015.

Iha reuniaun ne’e, Sekretária Estadu ba Apoiu no Promosaun Sosiu-Ekonómiku ba Feto esplika mudansa husi Sekretaria Estadu ba Promosaun Igualdade (SEPI) ba Secretaria de Estado para o Apoio e Promoção Socio-Económica da Mulher (SEM). “SEPI la iha diferensa ho SEM. Ema deit mak troka. Programa ne’ebé SEPI hala’o ona sei kontinua nafatan. Só aumenta deit ho programa apoiu feto sira iha área sosiu-ekonómika para bele hakbiit feto sira,” esplika Sekretária Estadu.

Sra. Veneranda Lemos mós husu ba funsionáriu ida-idak atu servisu di’ak iha Sekretaria Estadu ba Apoiu no Promosaun Sosiu-Ekonómika ba Feto. “Funsionáriu ida-idak tenke hamrik metin, tenke prontu servisu hodi serve povo. Instituisaun estadu hotu-hotu ne’e harii ho ran no ruin povo nian. Ema ida-idak iha ninia responsabilidade. Instituisaun ne’e ita tenke kuidadu ho diak. Kuidadu mak liu husi servisu diak,” katak Sekretária Estadu. Sra. Veneranda hatutan katak servisu ne’e tenke ho disiplina no inisiativa. Disiplina katak iha oras servisu tenke servisu duni, la bele tuur halimar deit. “Funsionáriu sira tenke servisu loloos,” tenik Sekretária Estadu, “la bele lor-loron tuur deit update status Facebook ka halimar game, hodi to’o fulan simu deit gaji buta.” Disiplina ne’e presiza kontrola, maibé kuandu funsionáriu ida-idak hala’o servisu ho responsabilidade, disiplina la’o ona no la presiza tan kontrola.

Servisu ho inisiativa katak halo planu servisu no implementa ho diak, la hein despasu husi superior. “Loron-loron antes fila ba uma, kada departamentu halo ninia planu atu implementa ba aban. Loron ida ne’e ba halo saida. Ida-idak tenke hatene ona sira-nia servisu. La hein despasu husi superior,” kata Sekretária Estadu. Sei karik iha problema servisu nian, hotu-hotu tenke rezolve iha instituisaun nia laran. Problema ne’e la bele haree nu’udar problema pesoal, tenke haree nu’udar problema servisu nian no rezolve liu husi dalan institusionál. Sekretárai Estadu husu ba funsionáriu sira atau hapara ibun komadre ne’e no lori lia tun sae. Ne’e hodi halo di’ak relasaun iha uma laran.

Importante mós ba funsionáriu hotu atu tau matan ba embiente hodi bele hetan ambiente ne’ebé di’aik ba ita hotu-hotu nia saúde. “Hau husu ba hotu-hotu, dader hamnasa ba malu. Kompromete ba malu. Komprometa ne’e la selu. Ita hakruk ba malu, hase malu, hamnasa ba malu ne’e osan mean la monu,” hatete Sra. Veneranda Lemos.