» Notisias

Tersa, 03 Maret 2015

Kontinuasaun Kolaborasaun ho Australian Aid Program (AusAid)

Sekretária Estadu ba Apoiu no Promosaun Sósiu-Ekonómika Feto Sra. Veneranda Lemos simu vizita husi Ambassador Australa ba Timor-Leste Sr. Peter Doyle iha loron Segunda, 2 Marsu 2015. Vizita ne’e Ambassador Australia hala’o hodi ko’alia kona-ba kontinuasaun ba kolaborasaun entre Australia ho Timor-Leste liuhusi Australian Aid Program (AusAid) iha área promosaun igualdade, liu-liu ba programa kombate violénsia bazeia ba jéneru ne’ebé hahú husi tempu Sekretaria Estadu ba Promosaun Igualdade (SEPI).

Iha vizita ne’e, Ambassador Australia akompaña husi Sekretária I Embaxada Australia Sra. Emi Quilty no Koordenadora Senior ba Dezenvolvimentu – Jéneru no Hakotu Violénsia Hasoru Feto Sra. Nurima Ribeiro Alkatiri.

Akompaña mós Sra. Kerry Brogan nu’udar Xefe Ekipa – Programa Hakotu Violénsia Hasoru Feto (Programa EVAW – Ending Violence Against Women) husi The Asia Foundation no Xian Warner nu’udar Koordenadora ba Prevensaun – Programa EVAW. Ne’e tanba The Asia Foundation maka implementadór ba Programa Hakotu Violénsia Hasoru Feto ne’ebé Governu Australia apoiu liuhusi AusAid ba hala’o iha Timor-Leste.

Iha ninia parte, Sekretária Estadu ba Apoiu no Promosaun Sósiu-Ekonómika Feto akompaña husi Asesor Jurídiku Sr. Eusébio Guterres.

Iha reuniaun ne’e, Sekretária Estadu ba Apoiu no Promosaun Sósiu-Ekonómika Feto Sra. Veneranda Lemos esplika katak Sekretaria Estadu ba Apoiu no Promosaun Sósiu-Ekonómika sei kontinua programa promosaun igualdade no kombate violénsia bazeia ba jéneru ne’ebé SEPI hala’o tiha ona.

“Programa hakbiit feto iha ekonomia mós iha tiha ona. Ami só hadia programa hakbiit feto iha ekonomia ne’e para bele apoiu no promove sósiu-ekonómika feto. Ami sei harii diresaun ka departamentu ida ba impementa programa ne’e,” tenik Sra. Veneranda Lemos. Sekretária Estadu ba Apoiu no Promosaun Sósiu-Ekonómika ba Feto mós husu kolaborasan husi Governu Australia ba programa ne’e.

Iha ninia resposta, Sr. Ambassador Boyle hatete katak programa husi Australian Aid (AusAid) ne’ebé relevante mak MDF (Market Development Facilities). Nia sei husu AusAid atu apoiu mós SEPI liu husi programa ne’e.

Programa MDF nia objetivu mak atu estimula investimentu, inovasaun negosiu, no reforma regulasaun hodi kria empregu no aumenta rendimentu ba feto no mane ki’ak sira iha área rurál no urbana iha rejiaun India-Pasifiku.

Programa ne’e nia knaar mak dezenvolve potensial ba kresimentu ne’ebé fó benefísiu ba ema ki’ak no inovasaun iha setór privadu nia laran no mós sai nu’udar katalisadór ba ideia no informasaun ne’ebé kontribui ba kresimentu ne’e. Progama ne’e hala’o iha nasaun tolu, hanesan: Fiji, Pakistan no Timor-Leste.