» Notisias

Kinta, 30 Juni 2016

Planu Asaun Nasionál kona-ba Violénsia bazeia ba Jéneru mak ita hotu nian

Liafuan abertura husi Diretora Jerál SEM Sra. Maria José Sanches ba Workshop Konsultasaun Nasionál ba PAN VBJ 2016-2020.
Hau nia dadér diak, respeitu no benvindu ba ita bo’ot sira hotu.
Hanesan ita hotu hatene ona, lei kontra violensia domestika ne’ebe aprova no promulga iha tinan 2010, iha mos artigu balun hanesan artigu sanulu resin tolu maka fo kompetensia ba governu atu halo promosaun no dezenvolve Planu Asaun Nassional ba prevensaun no servisu sira iha área violensia domestika, ho kolaborasaun ho sociedade civil tomak no mos ho família no orgaaun sira poder lokal nian”. Governu mos iha kompeténsia atu halo koordenasaun no ligasaun ba politika sira, medidas no asaun setor sira nian, ba nível nasional no komunitariu.

Nune’e maka lidera husi SEM no ein kolaborasaun ho instituisaun sira seluk no sosiedade sivil, iha tinan hirak liu ba hamosu tiha ona Planu Asaun Nasional konaba Violensia bazeia ba jeneru ba tinan 2012-2014.

Iha tinan kotuk, SEM mos kontratu tiha ona konsultor nasional ida ne’ebé hamutuk ho ekipa SEM halo tiha ona monitorizasaun no avaliasaun ba implementasaun Planu Asaun Nasional ne’e. Hanesan kontinuasaun ba rezultadu monitorizasaun ne’e maka SEM mos, agora dadaun, lidera hela prosesu Revizaun ba Planu Asaun Nasional Violensia bazeia ba jeneru, liu husi konsultas ho linhas ministeriais sira no reprezentantis sociedadi sivil atu nune’e bele produz fali Planu Asaun Nasional foun ba periodu tinan lima. Ita hotu hakarak atu Planu Asaun Nasional Violénsia Domestika sai hanesan dokumentu estratéjiku ida, koordenadu no sustentável hasoru violénsia hasoru feto no violénsia doméstika.

Atu hakarak ne’e, sai duni realístiku, , maka intervensaun no partisipasaun husi instituisaun governu nian, ONG nasional ka internasional, sosiedadi sivil sira relevanti teb-tebes. Planu Asaun Nassional violénsia bazeia ba jeneru labele sai asuntu SEM nian deit. Planu Asaun Nasional ne’e tenke sai obra konjuntu ida ne’ebe hot-hotu bele senti proprietário no sai na’in ba planu asaun ida ne’e.

Wainhira ita hotu sai nain ba planu ne’e maka implementaasaun mos sei diak liu. Ho hanoin ida ne’e maka, atu habelar liu tan prosesu konsultasaun no akomoda hanoin no hakarak hot-hotu nian, Timor-oan nian, maka SEM realiza workshop ida ne’e . Workshop ida ne’e sai oportunidadi ida ba ita bo’ot sira hotu atu kontribui ho ideias, hanoin, esperiénsia atu nune’e, hanesan temi ona iha leten, Planu Asaun Nassional violensia bazeia ba jeneru ba tinan lima sai dokumentu ida ne’ebe suporta estratejiku, koordenado no sustentável kontra violensia bazeia ba jeneru no violensia domestika.

Ikus liu, em nome da SEM, hau espera katak workshop ida ne’e bele iha partisipasaun no envolvimentu ativu hot-hotu nian no loron ida ne’e bele sai duni produtivu ba ita hot-hotu atu dezenvolve Planu Asaun Nassional ida konaba violénsia bazeia ba jeneru maka diak liu , realístiku, tuir kontestu Timor-Leste nian no aplikavel iha nível nasional no munnisipal. Ita mos hatene katak dadaun ne’e, Governu prepara hela atu halo transferensia kompetensias administrativa gradualmente ba Administrasaun no Autoridade munisipal sira. Tamba ne’e, espera katak, workshop ida ne’e bele hetan input konkretu atu implementasaun Planu Asaun Nasional ne’e bele kobre duni iha nível nasional, munisipal no teritoriu tomak. La basta produs Planu Asaun Nasional violensia bazeia ba jeneru, presiza mos atu disemina no hakle’an kompreensaun konteudu planu asaun nian. Tamba ne’e maka, dala ida tan atan hau realsa katak planu asaun ne’e Laos no labele sai SEM nian deit maibe ita hout nian.

Ba Ita bo’ot sira hotu maka prezenti iha ne’e, hau rasik no SEM hato’o Obrigada wa’in .

Dili, 30 Juño 2016
Maria José Sanches
Diretora Jerál SEM