» Notisias

Kinta, 01 September 2016

SEM Partisipa iha Konstrusaun Fatin Masin Manduki

Ministériu Komersiu, Industria & Ambiente hala’o lansamentu Konstrusaun Fatin Masin Manduki iha Postu Administrativu Atabae, Munisípiu Bobonaro, iha loron Segunda, 31 Agostu 2016.

Husi Sekretaria Estadu ba Apoiu no Promosaun Sosiu-Ekonómika Feto (SEM), Diretora Jerál Sra. Maria José Sanches mak partisipa iha eventu ne’e. Diretora Jerál Sekretaria Estadu ba Polítika Formasaun Profisionál no Empregu (SEPFOPE) mós partisipa. Sekretaria Estadu rua ne’e mak nu’udar parseiru importante ida iha projetu ne’e.

Ministru Komersiu, Indústria & Ambiente Sr. Constancio Pinto lansa dezafiu ba komunidade sira atu molok loron 28 Novembru, hot-hotu sei hamutuk fali iha fatin ida ne’e hodi halo kolleita ba dahuluk. Ministru mós hato’o ba komunidade katak nia konvida SEM ba partisipa mós iha lansamentu ne’e tanba iha lista produtór masin ne’e inklui mós feto ualunulu (28) resin.

Programa konstrusaun ne’e notavel teb-tebel tanba komunidade husi uma-lisan lubun ida maka oferese tiha rai hamutuk hektare 12 atu halo konstrusaun fatin indústria masin ne’e.

Iha serimónia lansamentu ne’e partisipa Autoridade Lokál, Diretór Jerál no Diretór Nasionál sira. Partisipa mós kompañia ne’ebe prontu atu suporta no sosa produtu lokál ne’e.