» Notisias

Segunda, 16 Januari 2017

Sekretaria Estadu ba Apoiu no Promosaun Sosio-Ekonómika Feto Enkoraja Polísia Feminina atu Luta ba Igualdade Jéneru

Enkorajamentu ne’e Sekretária Estadu hato’o iha atividade “Treinu ba Treinadores” ne’ebé Sekretaria Estadu ba Apoiu no Promosaun Sosiu-Ekonómika Feto (SEM) hala’o ba polísia feminina sira iha Salaun Maria Gorete, SEM, Dili, iha loron 17 Janeiru 2017.

Tuir Sekretária Estadu, iha instituisan Polísia Nasionál Timor-Leste (PNTL) mane mak domina tanba mane ladún fó fiar ba feto atu halo kna’ar importante sira. “Liu husi formasaun hanesan ne’e bele kapasita PNTL feminina sira atu nune’e bele hetan fiar husi mane atu halo kna’ar importante sira iha institusaun ne’ebé sira hala’o kna’ar ba,” katak Sra. Verenanda Lemos.

Polísia feminina sira mak tenke kria igualdade jéneru instituisaun ne’e. “Imi mak tenke luta atu kria igualdade jéneru, maibé imi tenke unidade,” tenik Sekretária Estadu. PNTL feminina mós tenke tane malu no ajuda malu, tanba wainhira la haree malu iha susar nia laran, hamonu mentalidade ema nian.

Entertantu Sekretaria Estadu ne’e mós preokupa kona-ba ID falsu sira ne’ebé ema uza hodi hatún malu iha media sosiál oras ne’e dadauk iha Timor-Leste. “Feto tau fali mane nia foto no mane tau fali feto nia foto hodi trata malu iha Facebook ne’e oinsa ita boot sira-nia atendementu? Atu atende buat hirak ne’e tenke liuhusi formasaun hanesan ne’e,” dehan Sra. Veneranda Lemos.

Molok hakotu Sra. Veneranda Lemos mós husu ba feto PNTL, atu hatudu nafatin karakter nu’udar feto maske halo jeitu hanesan mane iha atendementu ruma, maibé tenke hatene aan hanesan inan. “Polisia feto sira halo jeitu hanesan mane, maibé karakter feto hela iha hau no hau ko’alia asuntu ne’ebé dignifika feto,” tenik Sra. Veneranda Lemos. “Husu mós ba polísia atu respeita farda ne’ebé sira uza tanba atu hetan farda ne’e liuhusi prosesu naruk. Tanba ne’e tenke tau importansia ba farda refere,” hakatu Sekretária Estadu.

SEM hala’o “Formasaun ba Formador” ba membru PNTL sira husi Unidade Ema Vulneravel husi munisípiu 12 no Rejiaun Administrasaun Espesiál Oecusse husi loron 16 to’o 20 fulan Janeiru tinan 2017.