» Notisias

Segunda, 27 Agustus 2012

Kapasitasaun ba Funsionáriu nain 5 iha Rai Ketan

Sekretaria Estadu ba Promosaun Igualdade nia objetivu estratéjika ida mak atu hakbiit kapasidade institusional SEPI hodi bele hala’o ninia mandatu promove iguldade jéneru no hakbiit feto iha ita nia rai doben Timor-Leste. Nuudar atividade ida hodi atinji objetivu ne’e SEPI haruka ninia funsionáriu atu partisipa iha kursu ba hasae sira-nia abilidade no kapasidade hala’o sira-nia servisu.

Iha fulan Setembru ne’e, funsionáriu nain lima sei ba rai liur hodi hasae sira nia kapasidade: Sra Maria José Sanches (Inspetora no Auditora) ba Bandung, Indonesia; Sra. Maria Esperança Martins (Xefe Departamentu Rekursu Umanu) no Sra. Micaela Ximenes (Xefe Departamentu Monitorizasaun & Avaliasaun) ba Portugal; Sra. Leozita da Costa (Xefe Gabinete) no Eurosia Maria Marques Doutel Sarmento (Sekretária ba Diretor Jerál) ba Koréia.

Sra. Maria José Sanches sei tuir formasaun hahú husi loron 27 Agostu to’o 8 Setembru. Formasaun ne’e halo husi SIDOLA Tecs hanesan instituisaun ho espesialidade iha área formasaun, edukasaun, konsultasaun jestaun nian. Sra. Maria José Sanche sei tuir formasaun kona-ba auditoria finansial para bele halo diak liután auditoria no inspesaun ba implementasaun servisu loron-loron iha SEPI. Ida ne’e nuudar formasaun ba dala uluk iha área auditoria tanba SEPI foin estabelese Gabinete Inspesaun no Auditoria iha tinan 2012 ne’e.

Entretantu sira ne’ebé atu ba Portugal mak atu hala’o estagio profisionál iha Komisaun Sidadania no Igualdade Jéneru no mós iha Municipio Seixal hahú husi loron 1 fulan Setembru to’o loron 25 fulan Novembru 2012. Iha Komisaun Sidadania no Igualdade Jéneru sira atu halo estagio iha setór oi-oin: jestaun finanseira, divisaun jurídika, atendimentu, relasaun internasional, no seluk-seluk tán. “Ami mós sei aprende prátika diak, atu tau ba iha ita nia realidade nasionál,” katak Sra. Maria Esperança Martins. Komisaun Sidadania no Igualdade Jéneru mós sei fornese tán kursu balun ne’ebé iha relasaun ho servisu atu téknika sira bele halo empeñamentu diak iha servisu loron-loron nian.Iha Municipio Seixal, Sra. Maria Esperança Martins no Sra. Micaela Ximenes sei integra iha servisu lokál nu’udar interkambiu atu halo troka esperiénsia no prátika diak entre Timor-Leste no Portugal.

Sra. Leozita da Costa no Sra. Eurosia Doutel Sarmento ba Koréia hodi partisipa iha Programa Dezenvolvimentu ne’ebé hala’o husi Ministériu Igualdade Jéneru & Família Koréia husi loron 5 to’o loron 22 fulan Setembru 2012. Programa ne’e hala’o ba ofisiais governu nian iha nível lideransa husi nasaun sira ne’ebé sei dezenvolve, hanesan Bangladesh, Cambodia, Filipina, Indonesia, Laos, Mongolia, Nepal, Pakistan, Solomon Island, Sri Lanka, no Timor-Leste. Husi kada nasaun, Governu Koréia fó fatin ba ema nain rua atu partisipa ha programa ne’e.

Programa ne’e nia objetivu maka atu kapasita partisipante sira kona-ba formulasaun no implementasaun polítika jéneru área empregu no negosiu. Partisipante sira sei estuda kona-ba polítika empregu ba feto Koréia nian no estudu kazu sira para bele hatene oinsa dezenvolve polítika ne’ebé responde nesesidade empregu feto iha sira-nia nasaun ida-idak.