» Notisias

Segunda, 17 September 2012

Populasaun Viqueque Komemora Masakre Tahu Bein Kraras ba Dala 29

Komemorasaun ba loron levantamentu Kraras no masakre Tahu Bein ba dala 29 halao iha Kraras, Subdistritu Viqueque Vila, Distritu Viqueque.
Partisipa iha serimonia ne’e representante Presidente Republika, Vise Ministru Agrikultura & Paskas Sr. Marcos da Cruz, Diretora Nasional Administrasaun no Finansas Sra. Benigna Maria Amaral representa Sekretaria Estadu ba Promosaun Igualdade. Programa ne’e halao ho misa ba matebian sira ne’ebe mate iha masakre ne’e ne’ebe preside husi Pe. Natalino Amaral Gusmao husi Deosese Baucau.

Hotu tiha misa, kontinua ho hasae bandeira nasional meia haste ne’ebe hasae husi estudante sekundaria Distritu Viqueque. Hamutuk ho populasaun Distritu Viqueque husi suku walu ne’ebe iha area Kraras. Iha komemorasaun ne’e mos hatudu ho drama ne’ebe atu fo hanoin fali ba ema hotu kona-ba hahalok militar Indonesia nian ne’ebe iha tempu 1983 hodi hasoru populasaun sivil ne’ebe inusente ne’ebe mate iha tempu ne’eba liu-liu mane sira ne’ebe to’o agora iha maluk feto faluk barak sei tanis no halerik nafatin.

Molok atu remata sei populsauan sira hamutuk ho autoridade lokal no nasional ba hamutuk kari aifunan iha fatin masakre Tahu Bein Kraras.