» Notisias

Kuarta, 27 Februari 2019

Ekipa SEII Halao Sorumutu ho S.E. Primeiro-Ministru Taur Matan Ruak iha Edifisiu Palasiu Governu

Quarta-Feira-27/02/2019, Sekretária Estadu ba Igualdade no Inkluzaun, S.E. Sra. Maria José da Fonseca Monteiro de Jesus, ho ekipa halao sorumutu ho S.E. Primeiro-Ministru Taur Matan Ruak iha Edifisiu Palasiu Governu.

Objetivu iha enkontru informal ne’e hodi relata kona-ba progresu programa no atividade SEII nia hosi tinan 2018, no informa kona-ba planu ho programa atividade SEII nia ba tinan 2019-2023 nian.

Iha sorumutu ne’e S.E. PM foka liu ba pontu importante ne’ebé mak presiza halo mak hanesan: oinsá atu hare’e ba planu ne’ebé diak, oinsá atu hanoin programa ba oin, problema no dezafiu saida mak instituisaun infrenta no polítika governu nian tau importánsia liu ba dezenvolvimentu sustentável.

Iha momentu hanesan Sekretária Estadu mós introdus ba S.E. Primeiru-Ministru kona-ba programa importante SEII nian iha tinan lima nia laran mak hanesan, kona-ba programa SEII nian iha tinan lima,hakbi’it no haforsa ekonomia feto, hamenus no halakon forma sira hosi violénsia bazeia ba jéneru, Haforsa feto iha partisipasaun polítika, Haforsa asisténsia saúde ba feto, hadia no haforsa asesu feto iha ba Edukasaun no implementa polítika abordajen Integrada bazeia ba éneru.

Hato’o mós kona-ba planu Estratejiku SEII nian ba tinan 2018-2023 ho objetivu prinsipál 4 mak hanesan, Halo instituisaun sira sai sensível ba asuntu jéneru liu hosi estratéjia abordajen Integrada Jéneru iha polítika, Lei, Programa no orsamentu, Hapara violénsia kontra feto, labarik feto no grupu risku sira, Hakbi’it no promove partisipasaun feto iha dezenvolvimentu ekonomia Timor-Leste, Hasa’e partisipasaun feto iha área Polítika, iha nivel nasionál to munisipiu.