» Notisias

Kinta, 14 Maret 2019

DISKUSAUN PAINEL KONA-BA MANDATU ESPESIAL RAPPORTEUR ONU IHA NOVA YORKE

Iha loron 14 fulan Marsu tinan 2019, iha sesaun lokraik, Timor-Leste hamutuk ho Special Rapporteur Nasoens Unidas (ONU) nian kona-ba Violénsia kontra Feto organiza diskusaun painel (co-host side-event) kona-ba mandatu Special Rapporteur ONU kona-ba Violénsia kontra Feto no mós rekomendasaun jerál númeru 35 hosi Komité CEDAW kona-ba Violénsia-Bazeia ba Jéneru kontra feto. Iha diskusaun painel ida ne´e, Sra. Maria de Jesus mak halo abertura, Sra. Ambasadora Maria Helena de Jesus Pires, Reprezentante Permanente Misaun Timor-Leste nian ba Nasoens Unidas (ONU) mak sai nu´udar moderadora, no Sra. Dubravka Simonovic, Special Rapporteur ONU nian kona-ba Violénsia kontra Feto mak taka diskusaun ida ne´e.

Iha intervensaun abertura, Sekretária Estadu hatete katak problema violénsia-bazeia ba jéneru ne´e sai hanesan responsabilidade ema hotu nian no presiza tebes vontade no lideransa polítika (political will and leadership), no aproximasaun komunidade no mós parseiru atu servisu hamutuk hodi hapara violénsia-bazeia ba jéneru liuliu halo mudansa ba atitude no hahalok no norma sosiál ne´ebé normaliza tipu violénsia oioin.

Fahe mós prátika di´ak no progresu sira ne´ebé governu Timor-Leste halo ona hodi hapara violénsia-bazeia ba jéneru no violénsia doméstika.

Painel ba diskusaun ida ne´e mak hanesan tuir mai ne´e:
1. Sra. Dubravka Simonovic, Special Rapporteur ONU nian kona-ba Violénsia kontra Feto
2. Hilary Gbedemah, Prezidente ba Komité CEDAW
3. Feride Acar, Prezidente ba Grupu Konsellu Esperto Europa kona-ba Asaun kontra Violénsia-bazeia ba Jéneru no Violénsia Doméstika (GREVIO)
4. Jane Connors, Ativista ba Advokasia Direitu Vítima ba ONU
5. Pramilla Patten, Under-Secretary-General no Reprezentante Spesiál ba Sekretáriu Jerál ONU kona-ba Violénsia Seksuál iha Konflitu
6. Veronica Birga, Xefe Seksaun Feto no Jéneru, OHCHR