» Notisias

Tersa, 13 Agustus 2019

SEII Realiza Inkontru ho membru Komisaun Inter-Ministerial ba Planu Asaun Nasional Violensia Bazeia ba Jéneru

Sekretaria Estadu Igualdade no Inkluzaun Realiza Inkontru ho membru Komisaun Inter-Ministerial ba Planu Asaun Nasional Violensia Bazeia ba Jéneru

Salaun Maria Gorete SEII, 13-08-2019. Sekretaria Estadu Igualdade no Inkluzaun halao inkontru ho membru komisaun Inter-Ministerial ne’ebe mai husi ministeriu Xave sira inklui mos Sosiedade Sivil balun. Objetivu husi inkontru ne’e atu asegura koordenasaun ne’ebe efetivu entre parseiru sira hodi bele oferese kolesaun dadus Violensia Bazeia ba Jéneru ba monitorizasaun PAN VBJ no hodi identifika dezafiu no solusaun ba implementasaun PAN VBJ ida ne’ebe efetivu.

Liu husi sesaun abertura Diretor Jeral Sr. Armando da Costa informa katak sorumutu ba komisaun Inter-Ministerial ba Planu Asaun Nasional VBJ. “ Ohin ita kontinua hodi hare fila fali aprezentasaun balun kona ba instrumentu, mekanismu no monitoring ho relatóriu ba PAN VBJ, bazeia ba instrumentu hodi halao servisu monitorizasaun nian no antes tinan ida ne’e remata ita sei produs relatóriu anual no sei submete ba Parlamentu Nasionál nune’e mos sei submete ba Gabinete Primeiru Ministru kona ba ninia implementasaun durante tinan ida.

Tinan ida ne’e nian relatóriu iha ona faze final atu ba ona printing sei uja hela mekanismu ne’ebe SEII nian antes maibe ba oin sei uja instrumentu ne’ebe komisaun ida ne’e konkorda no adopta, SEII sei la produs relatóriu mesak ona. Durante ne’e ami mak elabora maibe relatóriu mai husi liña Ministeriu no Sosiedade Sivil.”

Matéria aprezentasaun ba iha inkontru ne’e maka kona ba Sistema Kolekta Dadus husi Liña Ministerial (membru KIM) sira, Diskute formatu ba relatóriu PAN-VBJ ba Konsellu Ministru no Parlamentu Nasional 2019.