» Notisias

Tersa, 14 Februari 2012

Timor-Leste partisipa iha Enkontru Ministerial Movimentu Nasaun Não-Alinhado (Non-Blok) kona-ba Dezenvolvimentu Feto

Sekretária Estadu Promosaun Igualdade S.E. Sra. Idelta Maria Rodrigues reprezenta Governu Timor-Leste hodi partisipa iha Terseiru Enkontru Ministerial Movimentu Nasaun Não-Alinhado (Non-Blok) kona-ba Dezenvolvimentu Feto iha Doha, Qatar hosi 12 to’o 14 Fevereiru. S.E. Sra. Idelta Maria Rodrigues halao vizita kortezia no sorumutuk ho Sekretáriu Jeral Interinu, S.E. Senhor Hamad Mohd. F. AL-Hajri hosi Konselhu Supremu Asuntu Família, lideradu hosi Sua Alteza, Rainha Sheikha Mozah Bint Nasser Al-Misnad, esposa hosi Liurai Qatar.

Durante enkontru S.E. Sra. Idelta M. Rodrigues lori governu Timor-Leste ninian naran hato’o agradesimentu ba Reinu Qatar ba konvite no mos ospitalidade durante vizita iha Doha. S.E. Sra. Idelta M. Rodrigues mos hato’o lia fuan solidáriu ba esforsu hotu-hotu ne’ebe mak Reinu Qatar halao atu avansa no dezenvolve direitu feto nian, alende agradesimentu ba Reinu Qatar ninian disponibilidade ajuda Timor-Leste iha área pretroleu no seluk-seluk tan haktuir Memorandu Entendimentu ne’ebe mak asina ona durante vizita Primeiru Ministru S.E. Senhor Kay Rala Xanana Gusmão no delegasaun iha fulan Janeiru 2012 foin lalais ne’e.

Hatan ba jestu solidáriu no preokupasaun Timor-Leste nian, Reinu Qatar demonstra agradesimentu no mos oferese ba delegasaun Timor-Leste hodi vizita Merkadu Tradisional Souq Wafiq, ne’ebe hetan fundu husi Reinu Qatar hodi dezenvolve empreza mikro feto nian. Feto no mos espera katak kooperasaun entre rai rua ne’e sei metin nafatin.

Iha Terseiru Enkontru Ministerial Movimentu Nasaun Não-Alinhado ne’e mos Sra. Idelta Maria Rodrigues hato’o lia menon relasiona ho dezelvolvimentu feto Timor-Leste iha ninian intervensaun katak maske Timor-Leste foin ukun rasik a’an iha tinan 10 nian laran, direitu feto Timor-Leste avansadu teb-tebes no hetan protesaun maka’as tuir lei. Kuota ba feto iha eleisaun Parlamentar ne’ebe sei realiza iha fulan hirak mai rekizita kada lista kandidatu Parlamentar entre ema nain tolu, 1 tengke rezerva ba feto, plataforma feto iha polítika mos estabele ona no asina hosi 23 partidu polítikus, kandidatu feto tolu mak sei tuir eleisaun Presidensial iha Marsu 2012, lei kontra violensia doméstika mos pasa ona iha 2010 no Grupu Traballu Jéneru nível Nasional no Distrital mos hahu halao servisu dau-dauk.

Esperiensia hosi nasaun barak ne’ebe mak hato’o durante intervensaun Ministerial durante loron hirak ne’e, bele sai nudar referensia di’ak ba Timor-Leste hodi hametin liu tan direitu feto Timor-Leste nian iha área hotu-hotu liu-liu mos hametin mos kooperasaun ba dezenvolvimentu feto ho rai seluk iha mundu.

Terseiru Enkontru Ministerial Movimentu Nasaun Não-Alinhado iha Doha, Qatar hetan partisipasaun hosi nasaun 80 resin ho total partisipante 500 husi nasaun 120.