» Notisias
Tersa, 13 Maret 2020
Gabinete Espoza Prezidente da Repúblika hamutuk ho SEII no Plan International Selebra Loron Internasionál Feto
Palásio Nobre, 12-03-2020—Diretór-Jerál SEII, Sr. Armando da Costa reprezenta Sekretária Estadu ba Igualdade no Inkluzaun partisipa no hato‘o diskursu iha Seremónia Selebrasaun Loron Internasionál Feto ba Tinan 2020 ne‘ebé realiza hosi Gabinete Espoza Prezidente da Repúblika ho ONG Plan Internasionál ho tema “Mai ita servisu hamutuk, harii mundu ida seguru, saudável, partisipativu ba feto no labarik-feto iha dezenvolvimentu sustentável”. Seremónia ne‘e hetan abertura hosi Espoza Prezidente da Repúblika, Cidália Lopes Nobre Mouzinho Guterres.
Objetivu prinsipál hosi seremónia ne‘e mak atu reforsa no valoriza kontribuisaun ema ida-idak ba serbisu no esforsu koletivu hodi atinji mudansa ne‘ebé mak sustentável no kontinua hola sesaun atu ema hotu kontinua foti asaun ba igualdade jéneru iha ne‘ebé deit.
Diretór-Jerál iha ninia intervensaun hato‘o mensajen Sekretária Estadu ba Igualdade no Inkluzaun relasiona ho seremónia loron importante ida ne‘e.
“Sekretária Estadu ba Igualdade no Inkluzaun hakarak hato‘o parabéns espesiál ba inan sira, bin-alin feto sira hotu iha selebrasaun Loron Internasionál Feto ba Tinan 2020 nian. Loron ida ne‘e espesiál tanba rezultadu esforsu ga luta feto sira nian, la‘ós ema ida mak foti fó, maibé feto ho ninia movimentu rasik mak kria istória ba loron ida-ne‘e”, tenik Armando.
Selebrasaun Loron Internasionál Feto hanesan rekoñesimentu ba eroína no eroi sira ne‘ebé luta ba estabelesimentu , espasu ida ne‘ebé seguru ba feto, joven, labarik-feto iha mundu, nune‘e mos atu kria oportunidade atu ema hotu partisipa iha dezenvolvimentu liuhosi sira-nia lian no asaun.
Entertantu iha sesaun abertura espoza Prezidente da Repúblika, Cidália Lopes Nobre Mouzinho Guterres hetete katak atu harii mundu ida seguru tenki hahú hosi ita-nia aan.
“Atu hari mundu ida ne‘ebé seguru no saudável ita presiza hahú kedas hosi ida-idak nia-aan, família, bairo, aldeia, suku no munisípiu. Tanba ne‘e mak Estadu halo revensaun oioin liuhosi lei, polítika no programa sira hodi asegura ambiente ida seguru no saudável ba ema hotu hodi bele partisipa no ativu iha prosesu dezenvolvimentu” dehan Cidália.
Nia hatutan tán katak liuhosi tema ne‘ebé iha nia presiza ema hotu nia kontribuisaun atu promove no realiza mundu igualdade no fó respeitu ba direitu feto.
“Ha‘u mak jerasaun ba Igualdade, signifika liuhosi asaun ema ida-dak nian, sei kontribui ona no sei kontribui nafatin diak liután ba esforsu koletivu hodi promove no realiza mundu igualdade fó respeitu ba direitu feto. Loron ida ne‘e lori ita ba haree fila-fali feto iha mundu tomak kona-ba luta feto maluk-sira hotu ne‘ebé mak hahú iha Europa iha tinan 1914 hodi reklama feto-nia direitu polítika no ekonomia liuliu hodi partisipa iha prosesu foti-desizaun no igualdade salariál”, dehan Cidália.
Iha biban ida ne‘e mós espoza Prezidente da Repúblika entrega sertifikadu apresiasaun ba eroi no eroína 12 ne‘ebé fó sira-nia kontribusaun iha área oioin iha luta ba ukun rasik-an no mós iha tempu dezenvovimentu rai ida ne‘e.
Selebrasaun ne‘e partisipa hosi Prezidente GMPTL Parlamento Nasionál, Distintas Deputada/u; Embaixadór Uniaun Europeia, Nova Zelandia; UN Women, Rezidente Koordenadór Nasoins Unidas; Reprezentante korpus diplomátiku, Parseiru dezenvolvimentu, Rede Feto; Reprezentante sosiedade sivíl, espoza Komandante-Jerál PNTL; espoza Maiór-Jenerál F-FDTL; Liña ministeriais, Eroina no Eroi 12 no estudante sira.
Departamentu Media SEII | Author : Média SEII
![]() | : 134 |
![]() | : 838 |
![]() | : 142720 |
![]() | : 964087 |
![]() | : 9 |