» Notisias

Tersa, 28 Juli 2020

SEII Lansa Inisiativa Spotlight iha Bobonaro, Ermera no Viqueque

Bobonaro, 23-07-2020--Sekretária Estadu ba Igualdade no Inkluzaun (SEII), Maria José da Fonseca Monteiro de Jesus lansa Inisiativu Spotlight husi UE-ONU hamutuk ho delegasaun Uniaun Europeia, Nasoins Unidas, Prezidente Autoridade Munisípiu Bobonaro no Organizasaun Sosiedade Sivíl sira iha Salaun Administrasaun Munisípiu Bobonaro.

Eventu ne‘e hanesan kontinuasaun husi lansamentu inisiativa spotlight nevebé hala‘o ona iha nível nasionál ba munisípiu atu promove atividade rejionál nian ne‘ebé antes ne‘e difikulta ho pandemia COVID-19. Lansamentu iha munisípiu Bobonaro mós atu hatudu katak Estadu no parseiru sira iha esforsu maka‘as atu responde ba violénsia hasoru feto no labarik-feto (VAWG-sila Inglés) hanesan prioridade esensiál ida.

“Responsablidade atu halakon violénsia oioin iha ita-nia sosiedade, ne‘e knaar no responsabilidade ita hotu nia esforsu”, nune‘e programa oioin sei implementa atu kombate violénsia hasoru feto no labarik-feto sira”, dehan Sua Exelénsia Maria José de Jesus. Sekretária Estadu mós fó hanoin liután katak, atraves lansamentu “inisiativa spotlight” ne‘e, komunidade hotu-hotu sei tau hamutuk hanoin no esforsu atu garante katak, violénsia no diskriminasaun hasoru feto, labarik-feto, ga mane no maluk ho defisiénsia sira, maluk sira ho orientasaun seksuál oioin iha ita-nia sosiedade nia laran sei lakon.

Eventu munisipál hirak-ne‘e sai hanesan oportunidade ida atu hamosu inisiativa spotlight ne‘e-rasik, atividade ne‘ebé planeia ba iha munisípiu sira, nune‘e mós parseiru xave, parte interesadu sira no apoiu sira ba iha komunidade. Inisiativa ne‘e ho objetivu atu apoia sasukat sira Governu nian atu halakon forma hotu husi prátika perigu ba violénsia hasoru feto no labarik-feto sira.

Investimentu tinan-tolu ba inisiativa spotlight iha Timor-Leste hamutuk 15 milaun dolares amerikanu. Ninia objetivu mak atu hametin enkuadramentu legál nasaun no instituisaun sira, halo promosaun ba norma positivu sosiál nian, hasa‘e asesu hodi apoia serbisu ba sobrevivente husi violénsia, hadi‘a kolesaun no utilizasaun dadus ba iha halo polítika ne‘ebé di‘ak liu no hametin parseria ho organizasaun sosiedade sivíl sira. Inisiativu ne‘e lidera husi UN Women, PNUD, UNICEF, UNFPA no ILO.

“Igualdade jéneru hanesan prekondisaun ida atu atinji Objetivu Dezenvolvimentu Sustentável. Inisiativa spotlight iha Timor-Leste signifika apoiu movimentu nasionál ida iha nível nasionál no munisipál ho promosaun abordajen multisetoriál ne‘ebé parseiru hotu hamutuk atu fó liman ba malu atu halakon forma oioin husi violénsia hasoru feto no labarik-feto sira. Nasoins Unidas serbisu hamutuk ho ema no instituisaun barak, husi altu nível ba to‘o povu kiik, inklui Governu, sosiedade sivíl, setór privadu, parseiru dezenvolvimentu, mane no labarik-mane sira, feto no labarik-feto sira atu halo mudansa loloos”, dehan Roy Trivedy, Koordenadór Rezidente ONU iha Timor-Leste.

Inisiativa spotlight iha Timor-Leste sei hetan impaktu iha nível nasionál, liuliu iha polítika, lejislasaun no apoiu ba iha instituisaun nasionál sira. Atividade nível komunidade sira sei foka liu ba iha munisípiu tolu ne‘ebé parseria ho sosiedade sivíl no organizasaun sira iha baze atu implementa programa ne‘ebé fó prioritáriu liubá iha sobrevivente husi violénsia feto foin-sa‘e, feto no labarik-feto, ema ho defisiénsia, servisu na‘in doméstika nian, komunidade LGBTI no feto sira ne‘ebé kaben sedu (idade 18 mai kraik).

“Ba Uniaun Europeia no nasaun membru sira, halakon violénsia hasoru feto no labarik-feto ne‘e prioridade ida ne‘ebé labele iha negosiasaun. Ita hotu hatene katak ita sei la hala‘o ida-ne‘e mesamesak. Persiza iha esforsu ne‘ebé iha koordenasaun di‘ak husi autór sira hotu: Governu Timor-Leste, organizasaun internasionál, lider polítiku, organizasaun sosiedade sivíl, ativista sira iha baze, feto no labarik-feto no- importante liu mak- mane no labarik-mane sira. Uniaun Europeia ho kontenti apoiu esforsu Timor-Leste nian atu halakon violénsia neebé perigu tebes ba feto no labarik-feto sira. Inisiativa spotlight sei hasa‘e esforsu no hametin instituisaun sira atu asegura feto no labarik-feto laiha tan moris iha ta‘uk nia laran,” tenik Andrew Jacobs, Embaixadór Uniaun Europeia ba Timor-Leste.

Lansamentu ba munisípiu rua seluk sei hala‘o iha Munisípiu Ermera no Viqueque iha loron 6 fulan Agostu tinan 2020 no loron 13 fulan Agostu tinan 2020.