» Notisias

Kuarta, 29 Juli 2020

SEII Lansa Sentru Empoderamentu ba Igualdade no Inkluzaun Sosiál iha Munisípiu Bobonaro

BOBONARO, 24-07-2020 - Sekretária Estadu ba Igualdade no Inkluzaun, Maria José da Fonseca Monteiro de Jesus, lansa estabelesimentu Sentru Empoderamentu ba Igualdade no Inkluzaun Sosiál (SEIIS), iha salaun administrasaun munisípiu Bobonaro.

Objetivu husi estabelesimentu sentru ida-ne’e mak atu fasilita promosaun igualdade no inkluzaun sosiál iha munisípiu sira no iha RAEOA, no fó apoiu ba servisu grupu traballu jéneru munisípiu no rejionál.

Iha intervensaun, Sekretária Estadu subliña katak SEII iha ona esforsu oioin atu apoiu grupu feto sira liuhusi Fundu Transferénsia Públiku atu nune’e sira bele iha atividade iha negósiu nian.

“SEII buka dalan oioin atu maluk feto sira bele forma grupu hodi bele asesu ba fundu transferénsia públika, nune’e sira bele iha fundu rasik ba asosiasaun hodi bele halo atividade negósiu. Ita mós komunika ho asosiasaun feto sira iha munisípiu 12 no RAEOA hodi introdús mekanizmu fundu rotativu iha tinan uluk no munisípiu rua mak konsege konkorda no implementa mekanizmu fundu refere,“ salienta Maria José de Jesus.

Foku prinsipál husi SEIIS maka empoderamentu ekonómiku liuhusi fasilita no fó apoiu ba grupu benefisiáriu fundu transferénsia públika SEII nian hahú husi tinan 2020. Sentru sei hatutan servisu SEII nian ba empoderamentu ekonómiku hanesan baze ba esforsu promosaun igualdade no inkluzaun tomak.

“Ha’u hato’o agradesimentu ba polítika governu nian liuhosi SEII ne’ebé iha hanoin di’ak no hakarak atu estabelese sentru empoderamentu ida ba dezenvolvimentu iha área jéneru hodi tau atensaun ba asuntu igualdade jéneru. Autoridade Munisípiu Bobonaro prontu atu koopera ho SEII no parseiru hotu ne’ebé maka fó apoiu ba prosesu estabelesimentu sentru refere,“ dehan Zeverino Soares dos Santos, Prezidente Autoridade Munisípiu Bobonaro.

Liuhusi servisu Sentru Empoderamentu Igualdade no Inkluzaun Sosiál ida-ne’e bele asegura grupu benefisiáriu sira ne’ebé hetan ona apoiu husi SEII hanesan poténsia bo’ot kontribui ba dezenvolvimentu iha nivel suku. Hamoris sentru baze iha munisípiu hodi bele fornese espasu ba halo koordenasaun, grupu sira atu uza oportunidade komunika ba malu, transforma maneira ba halo negósiu, dezeña atividade kreativu, organiza atividade ba promosaun igualdade no inkluzaun, inklui identifika problema ne‘ebé feto sira hasoru no buka solusaun ba problema hirak ne‘e.

Iha sorin seluk, Prezidente Asosiasaun Feto Potensiál Munisípiu Bobonaro, Domingas dos Santos liuhusi intervista salienta katak sentru ne‘e fó biban ba feto sira hodi buka ekonomia rasik nune‘e labele depende liu ba fundu husi mane.

“Fundu ne‘e fundu rotativu, bainhira uza tiha fundu ne‘e tinan ida, sei fó fila fali ba grupu seluk atu dezenvolve kapasidade feto ninian no mós atu hasa‘e ekonomia uma-laran atu nune‘e feto labele dependente demais ba rendimentu husi mane ka parseiru. Feto mós tenki kapasita sira-nia aan hodi bele hala‘o sira-nia ekonomia rasik,“dehan Domingas.

Ho sentru nia apoiu no grupu nia produtividade bele sustenta sira-nia atividade no hakotu neneik dependénsia ba subsídiu husi governu. Sentru Empoderamentu ba Igualdade no Inkluzaun Sosiál sei lansa iha munisípiu 11 seluk no RAEOA-Oé-cusse iha tinan ida-ne‘e.

SEII mós asina akordu parseria (MoU) ho Autoridade Munisípiu Bobonaro no mós Asosiasaun Feto ba Mudansa Munisípiu Bobonaro durante períodu estabelesimentu, iha tempu hanesan asosiasaun feto Bobonaro entrega hikas fundu rotativu ne‘ebé grupu sira hetan husi fundu transferénsia públika liuhosi mekanizmu fundu rotativu ba sentru refere.

Partisipa iha eventu ne‘e maka hanesan; Koordenadór Rezidente Nasoens Unidas Sr. Roy Trivedy, Xefe UN Women Sra. Sunita Caminha, reprezentante Uniaun Europeia, administradór postu sira, komandante PNTL Munisípiu Bobonaro no prezidente Asosiasaun.


Departamentu Media SEII | Author : Média SEII
Loron Boot SEPI
Loron Internasionál Feto RuráL
Loron Nasionál Feto Timor-Leste
Kampaña Loron 16 Ativismu Kontra Violénsia Hasoru Feto
Loron Internasionál Feto
Arkivu
Statistika Vizitantes

00665473

Ohin loron : 71
Hits ohin loron : 2140
Total : 123207
Hits : 665473
Online : 3