» Notisias
Sesta, 05 Oktober 2012
SEPI asina Memorandu Entendimentu ho Ministériu Hakbiit Feto & Protesaun Labarik Indonesia
Nuudar instituisaun ne’ebé foin harii iha 2007, prioridade ida husi Sekretaria Estadu ba Promosaun Igualdade (SEPI) mak atu hasae kapasidade institusionál SEPI para bele implementa didiak ninia mandatu hala’o promosaun igualdade jéneru no hakbiit feto iha área hotu-hotu moris nian. Atu dezenvolve kapasidade ne’e SEPI halo kolaborasaun ho instituisaun sira seluk inklui husi rai seluk nian.
Iha loron 5 fulan Outubru 2012 Sekretaria Estadu ba Promosaun Igualdade Sra. Idelta Maria Rodrigues asina Memorandu of Understanding (MoU ka Memorandu Entendimentu) ho Ministériu Hakbiit Feto no Protesaun Labmarik (Kementerian Pemberdayaan Perempuan dan Perlindungan Anak ka KPPPA) Indonesia Sra. Linda Amalia Sari Gumelar. Liu husi MoU ne’e, Governu Timor-Leste ho Governu Indonesia konkorda atu hola medidas ne’ebé nesesáriu ba promove no dezenvolve kooperasaun iha área hakbiit feto no promosaun igualdade jéneru. Asinatura ne’e hala’o iha edifisiu Ministériu Hakbiit Feto no Protesaun Labarik (Kementerian Pemberdayaan Perempuan dan Perlindungan Anak) iha Jakarta.
Tuir MoU ne’e parte rua ne’e sei halao dezenvolvimentu kapasidade institusionál; dezeńu no dezenvolvimentu programa hakbiit feto no promosaun igualdade jéneru; abordajen integrada jéneru no orsamentu responsivu ba jéneru; no área sira seluk ne’ebé parte rua ne’e sei deside hamutuk.
Atu implementa MoU ne’e, SEPI no KPPPA sei harii Grupu Servisu Konjunta ne’ebé kompostu husi ofisiais relevante husi nasaun rua ne’e. Grupu ne’e sei define prosedimentu, trasa planu, no rekomanda programa kooperasaun hodi atinje sira-nia objetivu liu husi SEPI no KPPA. Grupu ne’e mós sei monitoriza, avalia, no haree fila fail implementasaun MoU ne’e no hato’o relatóriu ba SEPI no KPPPA no Komisaun Konjunta ba Kooperasaun Bilateral Republika Indonesia no Repúblika Demokrátika Timor-Leste.
Iha ninia diskursu iha okaziaun ne’e, Sekretaria Estadu ba Promosaun Igualdade hato’o katak SEPI harkarak aprende barak husi Ministériu Hakbiit Feto no Protesaun Labarik Indonesia. “Asinatura MoU ne’e maka sinal husi kooperasaun ne’ebé sae ba beibeik iha área promosaun igualdade liu husi troka esperiénsia no matenek, dezenvolvimenu kapasidade no hakbiit polítika,” tenik Sekretaria Estadu.
Sekretaria Estadu mós hatete katak ne’e la’ós dala uluk Timor-Leste halo kooperasaun ho Indonesia iha área promosaun igualadade jéneru. “Iha fulan Juńu foin dadauk, SEPI asina Protokolu Kooperasaun ho Universidade Gadjah Mada. Ho asinatura MoU entre SEPI ho Ministériu Hakbiit Feto no Protesaun Labarik ne’e, iha oportunidade atu halao atividade ne’ebé envolve Ministériu Hakbiit Feto no Protesaun Labarik, Universidade Indonesia Jakarta, UGM, SEPI, no Universidade Nasional Timor Lorosa’e ne’ebé harii ona Sentru Estudu Jéneru,” katak Sra. Idelta Maria Rodrigues.
SEPI mós hakarak halao troka ideias ho KPPA kona-ba dezenvolve programa ne’ebé foka ba SEPI nia área tematika boot: Violénsia Bazeia ba Jéneru, Feto iha Polítika; Feto, Dame no Seguransa; Feto no Ekonomia; Hakbiit Feto, no Estatístika Jéneru. Iha kooperasaun ne’e SEPI sei konvida KPPA atu partisipa iha workshop no konferensia relevante iha Timor-Leste no KPPA sei konvida SEPI partisipa iha sira nia workshop, konferénsia no atividade seluk iha Indonesia.
Iha okaziaun asina MoU ne’e, Sekretária Estadu ba Promosaun Igualdade Sra. Idelta Maria Rodrigues mós konvida Ministra Hakbiit Feto no Protesaun Labarik Sra. Linda Amalia Sari Gumelar atu mai vizita Timor-Leste para bele haree problema no progresu feto Timor-Leste.
Entretantu Ministra Linda Gumelar hatete katak kooperasaun ne’e nuudar rezultadu ida husi dialogu ne’ebé halao iha tinan 2010 entre nia ho Sra. Idelta Maria Rodrigues. “Ami hasoru malu tinan rua liu ba bainhira partisipa iha reuniaun Komisaun Estatus Feto (Commission on the Status of Women) iha Nova Yorke no ami konkorda atu halo kooperasaun para hakbiit promosaun igualdade jéneru. Ho grasa Maromak, ohin loron ita bele realiza Memorandu Entendementu ne’e,” katak Sra. Linda Gumelar.
Fokus ba kooperasaun ne’e mak polítika responsivu ba jéneru tanba kondisaun nasaun rua ne’e ladun diferente katak mais ou menus 50% husi populasaun Indonesia no Timor-Leste mak feto. “Kooperasaun ne’e sei fo vantajem ba nasaun rua Timor-Leste no Indonesia. Ita sei troka informasaun no esperiénsia kona-ba oinsa hakbiit feto iha ita nia nasaun ida-idak, no mós oinsa haberan matenek no promove susesu implamentasaun polítika no programa hakbiit feto,” katak Sra. Linda Gumelar. “Kooperasaun ne’e agora sei foka liu ba hakbiit abordajen integrada jéneru. Maibé iha futuru sei habelar kooperasaun ne’e ba área dezenvolvimentu no protesaun labarik,” tenik Sra. Linda Gumelar.
Iha tempo badak Ministra Hakbiit Feto no Protesaun Labarik Indonesia ne’e sei halao vizita ba Timor-Leste atu haree direitamente programa hakbiit feto iha nasaun ne’e.
HAKARAK LE’E NOTISIAS NE’EBE HASAI HUSI MEDIA INDONEZIA NIAN BELE KLIK IHA :
Antara Kalbar: Indonesia Timor-Leste Tanda Tangani MoU Responsif Gender
Pos Kota: Linda Gumelar: 70% Usaha Kecil Dikelola Perempuan
Antara Sumbar: Delegasi Timor Leste Kunjungi UKM Perempuan Depok
Harian Terbit: Timor-Leste Kunjungi Industri Rumahan Depok
Infopublik: RI - Timor Leste Sepakati Kerjasama Pemberdayaan Perempuan
Pikiran Rakyat: Indonesia - Timor Leste Kerja Sama Perkuat Kebijakan Responsif Gender
Politik Indonesia: Soal Perempuan di Politik, Timor-Leste Layak Dicontoh
Sindo Radio: Indonesia dan Timor Leste Jalin Kerjasama untuk Responsif Gender
Suara Karya: Indonesia dan Timor Leste MoU Pemberdayaan Perempuan
Suara Pembaharuan: Indonesia - Timor Leste Jalin Kerja Sama Responsif Gender
Departamentu Media SEII | Author : Nug
![]() | : 146 |
![]() | : 862 |
![]() | : 142732 |
![]() | : 964111 |
![]() | : 8 |