» Notisias

Kuarta, 19 Desember 2012

Relatóriu SEPI kona-ba Grupu Traballu Jéneru: Presiza lideransa boot liután husi Governu

Iha loron 19 fulan Dezembru tinan 2012 Sekretaria Estadu ba Promosaun Igualdade (SEPI) hala’o enkontru ikus tinan 2012 ho Prezidente Grupu Traballu Jéneru Ministériu/Sekretaria Estadu no Distritu hotu-hotu. Enkontru ne’e orgiza hodi haree ba progresu ne’ebé hetan tiha ona ho esforsu atu integra perspetivu jéneru iha polítika, programa no orsamentu Governu tomak. Enkontro ne’e loke husi Sra. Veneranda Lemos, Sekretária Estadu ba Apoiu no Promove Setór Privadu ne’ebé hala’o knaar nu’udar Sekretária Estadu ba Promosaun Igualdade em exercício.

Iha sorumutuk ne’e SEPI aprezenta relatóriu inisiál kona-ba progresu husi Grupu Traballu Jéneru no esforsu husi abordajen integrada jéneru. Bazeia ba Rezolusaun Númeru 27/20011, mekanizmu Pontu Fokál Jéneru troka ho mekanizmu foun ne’ebé estabeese Grupu Traballu Jéneru iha Ministériu, Sekretária Estadu no Distritu hotu-hotu. Relátoriu ne’ebé hakerek bazeia ba informasaun ne’ebé hato’o husi membru Grupu Traballu Jéneru sira, deskreve avaliasaun kona-ba mekanizmu Grupu Traballu Jéneru foun ba tinan ida husi ninia adosaun.

Relatóriu inisiál ne’e hatudu progresu boot ne’ebé Grupu Traballu Jéneru sira hala’o ka implementa no sira-nia responsabilidade bazeia ba Rezolusaun 27/2011. “Grupu Traballu Jéneru Distritu sira hotu hala’o enkontru regular no kontribui ba hasa’e koñesimentu kona-ba asuntu jéneru iha nível local,” katak Sr. Armando da Costa, Diretór Jerál interinu Sekretaria Estadu ba Promosaun Igualdade.

Kona-ba Grupu Traballu Jéneru Nasionál, relatóriu ne’e hatudu katak sira-nia progresu sei limitadu tanba hetan obstákulu relasiona ho periódu eleisaun Presidensiál no Parlamentar no mós mudansa iha estrutura Ministériu/Sekretária Estadu nu’udar konsekuensia husi harii V Governu Konstitusionál.

Dadus husi relatóriu ne’e hatudu katak husi 15 Ministériu/Sekretaria Estadu, só Grupu Traballu Jéneru lima deit mak hala’o tiha ona enkontru durante tinan 2012. “Ita presiza lideransa boot liután husi Governu hodi asegura Grupu Traballu Jéneru bele hala’o sira-nia responsabilidade ne’ebé Rezolusaun 27/2011 obriga. Progresu importante husi Grupu Traballu Jéneru Nasionál sira mak Ministériu/Sekretária Estadu barak hatama tiha ona prioridade jéneru iha sira-nia Planu Asaun Nasionál no orsamentu ba tinan 2013,” tenik Sr. Armando da Costa.

Relatóriu finál kona-ba progresu Grupu Traballu Jéneru ne’e sei publika husi SEPI iha inisiu tinan 2013.