» Notisias

Tersa, 19 Maret 2013

Pontu Fokál SEPI ba Distritu

Hahú fulan Marsu 2013 SEPI iha ona Pontu Fokál SEPI ba Distritu. Kada Pontu Fokál ida sei koloka ba distritu ida, ho knaar fó apoiu ba Grupu Traballu Jéneru Distritu. Prosesu atu hetan Pontu Fokál ba Distritu hahú husi tinan 2011. Maibé prosesu rekrutamentu ba funsionáriu públiku hotu-hotu maka knaar no kompetensia husi Komisaun Nasionál Funsaun Públiku (KNFP). Ba rekrutamentu Pontu Fokál SEPI, prosesu iha KNFP hahú husi 29 Maiu 2012 to’o 15 Juñu 2012 ba hatama dokumentus husi rekerente sira.

“Iha etapa primeiru, Komisaun Nasionál Funsaun Públika halo selesaun dokumentus. Hotu tiha, hahú loron 17 fulan Dezembru 2012 sira hala’o prova eskrita ba kandidatu sira,” esplika Sra. Felicia Teixeira husi Departamentu Rekursu Umanu SEPI. Liu tiha prova eskrita, KNFP halo entrevista ba kandidatu sira iha loron 13 to’o 21 fulan Fevereiru 2013.

Ekipa ne’ebé halo entrevista maka na’in rua husi KNFP no na’in rua husi SEPI. “Resultadu husi prosesu sira ne’e, kandidatu na’in 10 mak liu. Maibé ema na’in rua rezigna an, agora só nain ualu (8) mak rekrutadu nu’udar Pontu Fokál SEPI ba Distritu,” tenik Sra. Felicia Texeira. Kandidatu na’in ualu ne’ebé rekrutadu asina “Termo de Aceitação” iha Komisaun Nasionál Funsaun Públika iha loron 19 fulan Marsu tinan 2013.

Atu kompleta Pontu Fokál SEPI ba Distritu 13, SEPI sei husu ba Komisaun Nasionál Funsaun Públiku atu hala’o tan prosesu rekrutamentu ba ema na’in lima.

Pontu Fokál SEPI ba Distritu nia knaar mak fó apoiu tékniku no administrativu ba Grupu Traballu Jéneru Distritu. Sira ne’e tenke hala’o koordenasaun atividade no programa Sekretaria Estadu ba Promosaun Igualdade (SEPI) iha Distritu no asegura relasaun no koordenasaun entre SEPI no Administrasaun Distritál kona-ba igualdade jéneru. Pontu Fokál sira mós reprezenta SEPI Iha eventu hotu-hotu ne’ebé organiza husi Distritu sira no hato’o relatóriu ba SEPI tuir hirarkia funsaun públika. Pontu Fokál SEPI ba Distritu tenke servisu hamutuk ho administrasaun Distritu elabora Planu Anuál Atividade. Hamutuk ho Grupu Traballu Jéneru Distritu, Pontu Fokál sei elabora proposta osamentu anual jéneru ba distritu, kontribui ba integrasaun asuntu jéneru iha proposta no porgama investimentu setorál no halo akompañamentu no avaliasaun ba ninia ezekusaun. Pontu Fokál SEPI mós kolabora ba realizasaun monitorizasaun no avaliasaun ba grupu feto sira ne’ebé simu Fundu Transferénsia Públika husi SEPI.

Pontu Fokál SEPI ba Distritu ne’ebé rekrutadu ona mak:
1. Domingas Soares Nunes ba Distritu Baucau
2. António Soares ba Bobonaro
3. Francisco T.G. de Araújo ba Covalima
4. Noemia Magno ba Distritu Dili
5. Nivia Ana dos Santos ba Distritu Ermera
6. Fátima Lourdes Alves ba Liquiça
7. Natalino Corte-Real Cardoso ba Manufahi
8. Salvador Ximenes ba Viqueque.