» Notisias
Segunda, 02 September 2013
Debate Estudante “Partisipasaun Feto iha Dezenvolvimentu Nasionál”
Iha loron 29 Agostu 2013 Sentru Estudu Jéneru Universidade Nasionál Timor Lorosa’e (SEJ-UNTL) hala’o debate estudante ho tema “Partisipasaun Feto iha Dezenvolvimentu Nasionál”. Debate ne’e hala’o iha Auditoriu Universidade Nasionál Timor Lorosa’e, Dili.
Partisipante ba debate ne’e mak grupu estudante sira husi universidade haat, hanesan: Dili Institute of Technology (DIT), Universidade Dili (UNDIL), Universidade Oriental (UNITAL), no Universidade Nasionál Timor-Leste (UNTL). Kada universidade reprezenta husi grupu ida ne’ebé kompostu husi estudante na’in hitu, só UNTL reprezenta husi grupu rua.
Atu prepara debate ne’e, kada grupu hala’o peskiza kiik-oan ida ho téma ne’ebe determina iha rifa. Grupu estudante husi DIT lori tema “Enkuadramentu Legál no Feto nia Partisipasaun iha Vida Polítika”; UNDIL lori tema “Feto no Empregu”; UNITAL lori tema “Envolvimentu Feto iha Rezisténsia”; UNTL grupu A lori tema “Edukasaun no Abordajen Jéneru”; no UNTL grupu B lori tema “Polítika Fila Hikas ba Eskola”.
Iha sesaun debate, kada grupu reprezenta husi estudante na’in tolu (3). Sira ida-idak hala’o aprezentasaun durante minutu 15. Hotu tiha aprezentasaun, ema sira ne’ebé asiste debate ne’e hetan oportunidade atu hato’o opiniaun ka perguntas ba grupu ne’ebé hala’o aprezentasaun, hodi hamosu debate. Julgadór nain tolu: Maria Barreto (husi Fundasaun Alola), Ana Paula Maia Santos (husi Sekretaria Estadu ba Promosaun Igualdade) no Dr. Matias … (dosente Fakuldade Siensia Sosiál no Polítika UNTL) mak julga debate ne’e.
Programa debate ne’e hala’o ho suporta husi Paz y Desarollo (PyD) no Sekretaria Estadu ba Promosaun Igualdade (SEPI).
SEJ-UNTL mak unidade ida husi Universidade Nasionál Timor Lorosa’e ne’ebé hamriik hodi partisipa iha dezenvolvimentu nasionál liu husi preparasaun rekursu umanu para ema hotu bele iha oportunidade hanesan atu bele dudu dezenvolvimentu nasionál ho koalidade as no iha balansu ba jéneru. SEJ-UNTL mak sentru estudu siéntifiku ho multidixiplina ne’ebé iha orientasaun ba igualdade jéneru no tane as direitu ema nian. SEJ-UNTL nu’udar instituisaun mak orienta liu ba perpetiva jéneru atu bele hamenus no halakon dezigualdade jéneru iha area hotu-hotu iha Timor-Leste.
Departamentu Media SEII | Author : Nug
![]() | : 126 |
![]() | : 819 |
![]() | : 142712 |
![]() | : 964068 |
![]() | : 5 |