» Notisias
Kuarta, 18 September 2013
Konsultasaun SEPI kona-ba Loron Nasionál Feto Dr. Mari Alkatiri: Tenke Koñese Maria Tapo para La Hakruk Demais ba Mane
![](foto_nuticia/SE-Alkatiri.jpg)
Hotu tiha hasoru ho Presidente FRETILIN Sr. Francisco Guterres “Lu Olo”, Sekretária Estadu ba Promosaun Igualdade Sra. Idelta Maria Rodrigues kontinua halo konsultasaun kona-ba história Loron Feto Nasionál ho Sekretáriu Jeral FRETILIN Dr. Mari Alkatiri.
“Ita selebra ona Loron Feto Nasional 3 Novembru maibé seidauk hatene loloos oinsa ninia história. Tan nee mak ami halo esforsu atu hakerek história badak kona-ba loron importante ne’e,” hatete Sra. Idelta Maria Rodrigues bainhira hala’o konsultasaun ne’e. Sr. Idelta esplika katak normalmente selebrasaun hala’o iha loron 3 Novembru, maibé tinan ida ne’e sei selebra loron 8 fulan Novembru. “Tinan-tinan ami hetan problema partisipasaun tanba tempu atu prepara mak la to’o. Loron Nasionál ne’e besik malu ho Dia dos Santos no Finado,” tenik Sekretaria Estadu.
Sekretáriu Jerál FRETILIN Dr. Mari Alkatiri fó parabens ba Sekretária Estadu ba Promosaun Igualdade tanba halo inisiativa ida ne’e. “Sei ita hahú halo história, nee inisiativa ha’u felisita. Kuandu ko’alia história, ko’alia kona-ba história. Kompetisaun entre partidu ne’e buat seluk,” katak Dr. Mari Alkatiri.
Sekretáriu Jerál FRETILIN mós dehan katak inisiativa hakerek história tenke mai husi leten. “Ita tenke asume história. Asume história ne’e la’ós parte positivu deit, asume mós parte negativu. La bele hanoin: negativu sira nian, positivu ami nian,” tenik nia. “Gender ne’e konseitu ohin loron, uluk ita uza mak emancipão das mulheres. Ne’e hahú husi FRETILIN. Ita nia dalan sei naruk, ita sei dook,” aumenta Dr. Alkatiri. Kona-ba Maria Tapo ne’ebé ninia loron mate sai nu’udar Loron Nasionál Feto, nia hatete, “Maria Tapo mak primeiro mulher ne’ebé mate kaer kilat (tiru malu kontra invasór). Maria Tapo ema na’in hira mak koñese ninia história? Tenke komesa hakerek. Ema tenke koñese. Ona, be-oan tenke koñese buat ida. Liu-liu maluk feto sira, para sira la bele hakruk demais ba mane. Feto sira mós fó an ba mate, sira mós halo rezisténsia.” Iha okaziaun ne’e, Sekretária Estadu ba Promosaun Igualdade mós husu ba eis Primeiru Ministru ne’ebé agora mós asume responsabilidade ba programa Zona Espesial Oecusse para tau matan ba interese no nesesidade feto iha programa ne’e. Dr. Alkatiri hatete ne’e loos ona, nia mós preokupa teb-tebes ho situasaun feto. “Hau kompriende ne’e susar. Uluk hau mak kria duni Gabinete Asesoria Promosaun Igualdade iha Gabinete Primeiru Ministru, ne’e para bele impoin ba Ministériu sira. Sei lai susar tebes Ministru sira atu kompriende,” katak nia.
Departamentu Media SEII | Author : Nug
![]() | : 67 |
![]() | : 665 |
![]() | : 142653 |
![]() | : 963914 |
![]() | : 8 |