» Notisias

Sesta, 09 November 2013

Sorumutu Bilateral Maratona SEPI ho Indonesia, Australia no Thailandia

Sekretária Estadu Sra. Idelta Rodrigues hala’o sorumutu bilateral ho delegasaun husi Indonesia, Australia no Thailandia ne’ebé mai partisipa Selebrasaun Loron Nasionál Feto Timor-Leste iha Ministériu Negósiu Estrangeiru iha Sabadu, 9 Novembru 2013.

Iha sorumutu ho rai tolu ne’e kualia kona-ba oinsa servisu hamutuk kona-ba promosaun igualdade no fahe informasaun prosesu servisu promosaun igualdade jéneru nian iha idak-idak nia rai.

Sorumutu dahuluk Sékretaria Estadu ho Delegasaun Indonesia ne’ebé lidera husi Sra. Linda Amalia Gumelar, Menteri Negara Pemberdayaan Perempuan dan Perlindungan Anak (PP-PA RI) hala’o iha tuku 9.30 dader.

Iha Sorumutu ne’e Sra.Gumelar hato’o parabens ba feto Timor-Leste tomak no hato’o mós obrigadu barak ba SEPI tanba konvite nia hodi mai partisipa komemorasaun Loron Nasionál Feto ba dala 36.

“Hau haksolok bele mai iha Timor-Leste asiste selebrasaun ne’e ne’ebé la’o furak tebtebes no hau haree ema hotu haksolok,” dehan Sra.Gumelar.

Iha tempu hanesan Sekretária Estadu ba Promosaun Igualdade, Idelta Rodrigues fahe mós informasaun kona-ba prosesu servisu Violénsia Bazeia ba Jéneru inklui Violénsia Doméstika nian ba bainaka sira husi Indonesia.

“Iha 2009, Parlamento Nasional Timor-Leste hasai Resolusaun kona-ba Gender Responsive Budgeting, no tuir mai Primeiro Ministro no Ministra Finansa hasai Karta Sirkulár katak orsamentu anual ba kada ministeriu tenki aloka mós orsamentu ba servisu igualdade jéneru nian. Governo nia programa mós hateten katak Lae ba Violénsia no Toleransia Zero” dehan Sra. Idelta Rodrigues.

Sra. Linda Gumelar hateten katak servisu ne’ebé Timor-Leste hala’o iha area igualdade jéneru tuir nia haree la’o furak tebes no ne’e hanesan inspirasaun ba Indonesia.

“Iha Indonesia ami foin mak luta oinsa iha Lei ida ne’ebé bele sai base legal ba ami, maibe iha Timor-Leste hau haree imi servisu diak liu fali ami,” hatutan Sra. Gumelar.

Hau foin enkontru ho delegasaun Indonesia Sekretária Estadu Sra. Idelta Rodrigues hasoru malu mós ho Sra. Herinder Sihdu, Primeiru Secretariu husi Ministeriu Negosiu Estrangeiru, Australia.

Iha sorumutu entre Timor-Leste ho Australia, Sra. Sihdu fahe esperiensia Australia no hateten katak foin ba dala uluk iha Australia nia istoria feto kaer kargu ministra Negósiu Estrangeiru. Husi 1940 to’o periodu governu uluk mane deit mak domina. Ida ne’e buat foun ida ba ami,” haklaken Sra. Sidhu.

“Ami haksolok imi halo selebrasaun furak no estudantes sira mós hatudu dansa furak tebes”

Iha tempu hanesan Sra. Idelta Rodrigues fahe mos informasaun kona-ba prosesu servisu Sekrataria Estadu ba Promosaun Igualdade durante ne’e no relasaun servisu ho governo Australia.

Iha loron hanesan, Sekretária Estadu ba Promosaun Igualdade Sra. Idelta Rodrigues simu mós bainaka husi Thailandia. Sorumutu bilateral ho Thailandia, Sra. Idelta isplika kona-ba rekursus humanus SEPI no oinsa buka dalan atu aumenta kapasidade funsionariu sira. Representate husi Thailandia hateten katak iha Thailandia iha universidade rua ne’ebé hanorin programa estudu jéneru nune’e se SEPI hakarak haruka funsionaru ba kontinua estudu iha area jéneru, sira bele fasilita.

Sorumutu Sekretária Estadu ba Promosaun Igualdade Sra. Idelta Rodrigues ho delegasaun Indonesia, Australia no Thailandia hotu ho diak no sei halo kolaborasaun servisu igualdade jéneru nian diak liu tan iha futuru.