» Notisias

Kinta, 22 Januari 2014

Orsamentu SEPI 2014 Aumenta

Parlamentu Nasionál iha ninia plenaria iha loron 21 Janeiru 2014 pasa Orsamentu Jerál Estadu 2014 ba Sekretaria Estadu ba Promosaun Igualdade (SEPI). Total motante orsamentu ne’ebé pasa mak USD 2.606.000. Ho nune’e hatudu katak orsamentu SEPI ba 2014 aumenta husi orsamentu iha tinan 2013 USD 2.167.000. Orsamentu SEPI ba tinan ida ne’e hetan mudansa boot iha programa Transferénsia Públika, ne’ebé tuir SEPI nia proposta ninia montante maka USD 500.000. Parlementu Nasionál hato’o Proposta Alterasaun No. 93 ne’ebé aumenta orsamentu ne’e ba USD 1.000.000. Programa Transferénsia Públika ne’e nia komponente bo’ot maka atividade ba hakbiit ekonomia feto. Atividade ne’ebé hahú iha 2008 ne’e fo apoiu finanseiru ba grupu feto sira atu halo negósiu kiik no mós aumenta sira-nia kapasidade kona-ba produsaun no jere negósiu. Atividade importante seluk ne’ebé hetan alokasaun orsamentu liu husi Transferénsia Públika mak Implementasaun Lei Kontra Violénsia Doméstika no Planu Asaun Nasionál kona-ba Violénsia Doméstika no Violénsia Bazeia ba Jéneru. Liu husi Transferénsia Públika, Governu fó apoiu ba Organizasaun Náo-Governamentais sira ne’ebé implementa atividade kombante violénsia domestika no violénsia hasoru feto. Totál orsamentu mak USD 300.000 ne’ebé sei fahe ba ALFELA, AMKV, Casa Vida, Fokupers, Fundasaun Alola, Mane ho Vizaun Foun, no PRADET. Atividade seluk, Implementasaun Lei Kontra Violénsia mak Diseminasaun Informasaun no Formasaun ba autoridade sira ne’ebé impelmenta lei ne’e iha nivel lokál no nasionál. Sira ne’e inklui autoridade lokál/lider komunitária, Grupu Traballu Jéneru, PNTL/F-FDTL, autór judisiáriu, Centro de Formação Judiciaria, no Ministériu xafe hanesan Ministériu Solidariedade Sosiál no Ministériu Saúde. Diseminasaun informasaun ne’ebé atu hala’o mak kontinuasaun husi atividade ne’ebé hala’o iha nivel suku. Atu apoiu Sentru Estudu Jéneru iha Universidade Nasionál Timor Lorosa’e (UNTL), SEPI ba tinan ida ne’e sei aloka USD 60.000 liu husi Transferénsi Públika. Osan ne’e Sentru Estudu Jéneru sei atu uza ba halo peskiza kona-ba “Feto, Be no Sanitasaun.” Ba apoiu Gabinete Perita CEDAW, tinan ida ne’e SEPI aloka USD 140.000. Polítika Governu ba desentralizasaun sei hahú ho pre-deskonsentrasaun iha tinan 2014. SEPI sei apoiu preparasaun feto sira ba ida ne’e iha distritu 13 no aloka USD 200.000 hodi garante igualdade partisipasaun mane no feto sira iha desentralizasaun.